ایل این جی کی فوری ملی تو بجلی مہنگی اور لوڈشیڈنگ میں اضافہ ہوگا، پاور ڈویژن کا انتباہ

اسلام آباد: پاور ڈویژن نے پیٹرولیم ڈویژن کو مراسلہ ارسال کرتے ہوئے خبردار کیا ہے کہ ملک میں بجلی کی طلب میں تیزی سے اضافہ ہورہا ہے اور اگر فوری طور پر ایل این جی کے چار جہازوں کا انتظام نہ کیا گیا تو بجلی کی قیمت میں اضافہ اور لوڈشیڈنگ کے دورانیے میں مزید اضافہ ہوسکتا ہے۔

ذرائع کے مطابق پاور ڈویژن نے اپنے مراسلے میں مؤقف اختیار کیا ہے کہ گرمی کی شدت بڑھنے کے باعث بجلی کی طلب میں نمایاں اضافہ ہوا ہے، جس کے پیش نظر پاور پلانٹس کے لیے ایل این جی کی فراہمی ناگزیر ہوچکی ہے۔

مراسلے میں پیٹرولیم ڈویژن سے مطالبہ کیا گیا ہے کہ جلد از جلد ایل این جی کے چار جہازوں کا بندوبست کیا جائے تاکہ بجلی کی پیداوار کو برقرار رکھا جاسکے۔

ذرائع کا کہنا ہے کہ مراسلے میں یہ بھی تجویز دی گئی ہے کہ قطر کے ساتھ طویل المدتی معاہدوں کے تحت ایل این جی کی فراہمی کو یقینی بنایا جائے۔

پاور ڈویژن نے خدشہ ظاہر کیا ہے کہ اگر ایل این جی دستیاب نہ ہوئی تو بجلی کی پیداوار کے لیے مہنگا ڈیزل استعمال کرنا پڑے گا، جس سے پیداواری لاگت میں اضافہ ہوگا اور عوام کو مہنگی بجلی کا سامنا کرنا پڑ سکتا ہے، جبکہ لوڈشیڈنگ کا دورانیہ بھی بڑھنے کا امکان ہے۔