کراچی سے پہلی حج پرواز 160 عازمین کے ساتھ حجازِ مقدس روانہ

ملک بھر کے ہوائی اڈوں سے حج پروازوں کا باقاعدہ آغاز ہو گیا ہے، جس کے تحت کراچی کے جناح انٹرنیشنل ایئرپورٹ سے پہلی نجی پرواز 160 عازمین کو لے کر حجازِ مقدس روانہ ہوئی۔ رواں سال صرف کراچی سے 31 ہزار سے زائد عازمین کی روانگی متوقع ہے۔

کراچی ایئرپورٹ پر منعقدہ خصوصی تقریب میں گورنر سندھ نہال ہاشمی اور وزارتِ مذہبی امور کے حکام نے عازمین کو رخصت کیا۔ اس سال ‘روڈ ٹو مکہ’ پراجیکٹ کے تحت عازمین کی امیگریشن کراچی میں ہی مکمل کی جا رہی ہے، جس سے انہیں سعودی عرب پہنچ کر طویل انتظار سے نجات ملے گی۔

گورنر سندھ نہال ہاشمی نے عازمین سے خطاب کرتے ہوئے انہیں اس مبارک سفر پر مبارکباد دی اور ملک کی ترقی و خوشحالی کے لیے خصوصی دعاؤں کی درخواست کی۔ تاہم، انہوں نے اپنے خطاب میں کچھ سخت جملے بھی استعمال کیے، جن میں ان کا کہنا تھا کہ پاکستانی عمرہ کرنے میں تو پہلے نمبر پر ہیں لیکن ‘دو نمبری’ میں دوسرے نمبر پر ہیں۔ انہوں نے عازمین کو صبر کی تلقین کرتے ہوئے کہا کہ سوشل میڈیا پر انتظامات کی شکایات ڈالنے کے بجائے حج کی مشکلات کو خندہ پیشانی سے برداشت کرنا چاہیے۔