بشریٰ بی بی کی آنکھ کی کامیاب سرجری، ہسپتال سے دوبارہ اڈیالہ جیل منتقل

اڈیالہ جیل کے سپرنٹنڈنٹ نے بشریٰ بی بی کی صحت کے حوالے سے تازہ ترین اپڈیٹ جاری کرتے ہوئے بتایا ہے کہ سابق خاتونِ اول کی دائیں آنکھ کی بینائی متاثر ہونے کی شکایت پر ان کی کامیاب سرجری مکمل کر لی گئی ہے، جس کے بعد انہیں دوبارہ جیل منتقل کر دیا گیا ہے۔

سپرنٹنڈنٹ اڈیالہ جیل کے مطابق، بشریٰ بی بی نے دائیں آنکھ میں تکلیف اور بینائی کے مسائل کی شکایت کی تھی، جس پر جیل انتظامیہ نے فوری ایکشن لیتے ہوئے ماہرینِ چشم سے ان کا معائنہ کرایا۔ طبی معائنے کے دوران ان کی دائیں آنکھ میں ‘ریٹینل ڈیٹچمنٹ’ (پردہ چشم کا ہٹ جانا) کی تشخیص ہوئی، جس پر ڈاکٹروں نے ہنگامی بنیادوں پر سرجری کا مشورہ دیا۔

تشخیص کے بعد، 16 اپریل کی شام بشریٰ بی بی کو راولپنڈی کے ایک نجی ہسپتال منتقل کیا گیا، جہاں ضروری ٹیسٹ اور طبی معائنے کے بعد ان کی رضامندی سے آپریشن کیا گیا۔ یہ سرجری پروفیسر ڈاکٹر ندیم قریشی اور ان کے پینل نے انجام دی۔ کامیاب آپریشن اور ایک رات ہسپتال میں زیرِ مشاہدہ رہنے کے بعد، ڈاکٹروں نے ان کی حالت کو اطمینان بخش قرار دیتے ہوئے ڈسچارج کر دیا، جس کے بعد انہیں واپس اڈیالہ جیل منتقل کر دیا گیا ہے۔ جیل انتظامیہ کا کہنا ہے کہ ڈاکٹروں کی ہدایات کے مطابق ان کا طبی فالو اپ اور معائنہ جاری رہے گا۔