ایرانی صدر مسعود پزشکیان اور فیلڈ مارشل عاصم منیر کی ملاقات، ایرانی میڈیا

تہران: ایرانی میڈیا کے مطابق ایرانی صدر مسعود پزشکیان اور پاکستانی فیلڈ مارشل عاصم منیر کے درمیان اہم ملاقات ہوئی ہے۔

 میڈیا رپورٹس کے مطابق فیلڈ مارشل عاصم منیر کے حالیہ دورۂ تہران کو ایران اور امریکا کے درمیان معاہدے کی کوششوں میں اہم پیش رفت قرار دیا جا رہا ہے۔

ذرائع کے مطابق فیلڈ مارشل نے ایرانی صدر مسعود پزشکیان سے اہم ملاقات کی، جسے مذاکراتی عمل کے لیے نہایت اہم سمجھا جا رہا ہے۔

اس سے قبل انہوں نے تہران میں ایرانی پارلیمنٹ کے اسپیکر باقر قالیباف سے ملاقات کی، جو ایرانی سیاسی نظام میں ایک بااثر شخصیت سمجھے جاتے ہیں۔ انہوں نے ایرانی وزیر خارجہ عباس عراقچی اور دیگر اعلیٰ عسکری حکام سے بھی ملاقاتیں کیں۔

آئی ایس پی آر کے مطابق یہ دورہ ایران اور امریکا کے درمیان جاری ثالثی کوششوں کا حصہ ہے، جس میں پاکستان کے وزیر داخلہ محسن نقوی بھی موجود ہیں۔

دوسری جانب امریکی صدر ڈونلڈ ٹرمپ نے بیان دیا ہے کہ اگر ایران اور امریکا کے درمیان ڈیل طے پا گئی تو وہ پاکستان کا دورہ کریں گے، جس سے خطے میں سفارتی سرگرمیوں میں مزید تیزی آ گئی ہے۔