پاکستان اور ترکیہ کے درمیان کمانڈو و سپیشل فورسز مشق ’’جناح XIII کامیابی سے مکمل

راولپنڈی/انقرہ: پاکستان اور ترکیہ کے درمیان برادرانہ عسکری تعلقات کو مزید تقویت دینے کے لیے مشترکہ کمانڈو اور اسپیشل فورسز مشق ‘جناح-XIII’ ترکیہ میں کامیابی کے ساتھ اختتام پذیر ہو گئی ہے۔ پاک فوج کے شعبہ تعلقاتِ عامہ (ISPR) کے مطابق، انقرہ اور سپارٹا میں منعقد ہونے والی ان مشقوں میں دونوں ممالک کی افواج نے انسدادِ دہشت گردی کے پیچیدہ آپریشنز میں حصہ لیا۔ مشق کا بنیادی مقصد جدید عسکری تکنیک، طریقہ کار اور آپریشنل صلاحیتوں کو بین الاقوامی معیار کے مطابق بہتر بنانا تھا۔

آئی ایس پی آر کے مطابق، مشق کے دوران خاص طور پر آبادی والے علاقوں میں جنگ (Urban Warfare) اور بارودی سرنگوں (IEDs) سے نمٹنے کی خصوصی تربیت دی گئی۔ دونوں ممالک کے دستوں نے بلند پایہ پیشہ ورانہ مہارت کا مظاہرہ کرتے ہوئے تمام عسکری اور سفارتی اہداف کامیابی سے حاصل کیے۔ ان مشقوں کو پاکستان اور ترکیہ کے درمیان دہائیوں پر محیط دفاعی تعاون اور اسٹریٹجک شراکت داری میں ایک اہم سنگِ میل قرار دیا جا رہا ہے۔