حج آپریشن 2026 میں بڑی پیش رفت؛ ‘روڈ ٹو مکہ’ پراجیکٹ کے لیے سعودی امیگریشن ٹیم کراچی پہنچ گئی

کراچی: حج آپریشن 2026 کے حوالے سے ایک اہم پیش رفت سامنے آئی ہے، جہاں روڈ ٹو مکہ پراجیکٹ کے باضابطہ آغاز کے لیے سعودی عرب کے امیگریشن حکام کراچی پہنچ گئے ہیں۔ ڈائریکٹر حج کراچی امتیاز شاہ کے مطابق، سعودی ٹیم 40 سے زائد اراکین پر مشتمل ہے جو کراچی ایئرپورٹ پر عازمینِ حج کی پری امیگریشن کا عمل مکمل کرے گی۔ جناح انٹرنیشنل ایئرپورٹ پہنچنے پر وزارتِ مذہبی امور اور سول ایوی ایشن اتھارٹی (CAA) کے اعلیٰ حکام نے سعودی وفد کا پرتپاک استقبال کیا۔

اس پراجیکٹ کے تحت عازمینِ حج کی سعودی امیگریشن اب کراچی ایئرپورٹ پر ہی مکمل کر لی جائے گی، جس سے عازمین کو سعودی عرب پہنچنے پر طویل انتظار اور قطاروں سے نجات ملے گی۔ ڈائریکٹر حج نے مزید تصدیق کی ہے کہ کراچی سے پہلی حج پرواز آج رات 2 بجے کے بعد روانہ ہوگی، جس کے لیے تمام انتظامات مکمل کر لیے گئے ہیں۔