پاکستان اور ایشیائی ترقیاتی بینک کے درمیان تعاون مزید مضبوط کرنے پر اتفاق

واشنگٹن ڈی سی: وفاقی وزیر برائے خزانہ و محصولات سینیٹر محمد اورنگزیب نے ورلڈ بینک اور آئی ایم ایف کے بہار اجلاسوں کے موقع پر عالمی مالیاتی اداروں کے سربراہان اور اہم شخصیات سے ملاقاتوں کا سلسلہ مکمل کر لیا ہے۔ ان ملاقاتوں کا بنیادی محور پاکستان کی معاشی اصلاحات، بیرونی سرمایہ کاری اور بین الاقوامی کیپٹل مارکیٹ میں پاکستان کی دوبارہ فعال واپسی رہا ہے۔ وزیر خزانہ نے ایشیائی ترقیاتی بینک (ADB) کے صدر ماساتو کاندا سے ملاقات کی، جس میں پاکستان اور اے ڈی بی کے درمیان تعاون کو مزید مضبوط کرنے پر اتفاق کیا گیا۔ انہوں نے پاکستان کے پہلے پانڈا بانڈ کے اجرا میں اے ڈی بی کے تعاون کو سراہا اور آئی ایم ایف پروگرام میں مثبت پیش رفت کی امید ظاہر کی۔

اقوام متحدہ کے سیکرٹری جنرل انتونیو گوتریس سے ملاقات میں وزیر خزانہ نے عالمی معاشی چیلنجز، مشرقِ وسطیٰ کی صورتحال اور ترقی پذیر ممالک میں خوراک و توانائی کے تحفظ پر تبادلہ خیال کیا۔ سیکرٹری جنرل نے خطے میں امن و استحکام کے لیے پاکستان کے کردار کی تعریف کی۔ علاوہ ازیں، فِچ ریٹنگز (Fitch Ratings) کے ساتھ ملاقات میں پاکستان کی B- ریٹنگ برقرار رہنے کا خیرمقدم کیا گیا اور وزیر خزانہ نے یقین دہانی کرائی کہ مالی سال 2026 کے لیے بیرونی فنانسنگ کے انتظامات مکمل کر لیے گئے ہیں۔وزیر خزانہ نے ایک اہم پیش رفت بتاتے ہوئے کہا کہ پاکستان میں ورچوئل ایسٹس ریگولیٹری اتھارٹی قائم کی جا چکی ہے اور اسٹیٹ بینک نے کرپٹو کرنسی لین دین پر 2018 سے عائد پابندی واپس لے لی ہے، جس کے تحت بائنانس (Binance) جیسے پلیٹ فارمز کو این او سی جاری کیے گئے ہیں۔ فرینکلن ٹیمپلٹن کی قیادت کو بریفنگ دیتے ہوئے انہوں نے بتایا کہ اسلام آباد، کراچی اور سیالکوٹ ایئرپورٹس کی آؤٹ سورسنگ کا عمل جاری ہے جبکہ بجلی کی تقسیم کار کمپنیوں (DISCOs) کی نجکاری بھی حکومت کی ترجیحات میں شامل ہے۔ جے پی مورگن کی ٹیم کو سعودی عرب کی جانب سے ملنے والی مالی معاونت اور روپے سے منسلک ڈالر بانڈز کے بارے میں بھی آگاہ کیا گیا۔