اسلام آباد: بری امام میں تجاوزات کے خلاف آپریشن کے دوران میدانِ جنگ بن گیا

وفاقی دارالحکومت کے علاقے نورپور شاہاں (بری امام) میں تجاوزات کے خلاف گرینڈ آپریشن کے دوران شدید ہنگامہ آرائی اور تصادم کے باعث صورتحال انتہائی کشیدہ ہو گئی ہے۔ کیپیٹل ڈویلپمنٹ اتھارٹی (CDA) اور پولیس کی بھاری نفری جب آپریشن کے لیے پہنچی تو انہیں مقامی مکینوں اور مظاہرین کی جانب سے سخت مزاحمت کا سامنا کرنا پڑا۔ احتجاج نے اس وقت پرتشدد رخ اختیار کر لیا جب مشتعل مظاہرین نے سی ڈی اے کی گاڑیوں اور مشینری کو آگ لگا دی، جس سے علاقے میں خوف و ہراس پھیل گیا۔

حالات پر قابو پانے کے لیے اسلام آباد پولیس کی جانب سے مظاہرین کو منتشر کرنے کے لیے آنسو گیس کی شیلنگ اور ربڑ کی گولیوں کا بے دریغ استعمال کیا گیا۔ جواب میں مظاہرین کی جانب سے پتھراؤ کیا گیا، جس کے نتیجے میں کئی اہلکاروں اور مظاہرین کے زخمی ہونے کی اطلاعات ہیں۔ کشیدگی کے باعث بری امام اور گردونواح کے علاقوں میں پولیس اور رینجرز کی بھاری نفری تعینات کر دی گئی ہے اور پورے علاقے کو حصار میں لے لیا گیا ہے۔انتظامیہ کا موقف ہے کہ سرکاری زمینوں پر قائم غیر قانونی تجاوزات کا خاتمہ ناگزیر ہے، تاہم مقامی افراد کا دعویٰ ہے کہ انہیں بغیر پیشگی اطلاع کے بے دخل کیا جا رہا ہے۔ فی الوقت علاقے میں آپریشن روک دیا گیا ہے لیکن فریقین کے درمیان تناؤ برقرار ہے۔ پولیس نے گاڑیوں کو آگ لگانے اور سرکاری کام میں مداخلت کرنے والے افراد کی نشاندہی کے لیے سی سی ٹی وی فوٹیج کی مدد سے کارروائی کا آغاز کر دیا ہے