وزیراعلیٰ خیبرپختونخوا سہیل آفریدی کے ناقابل ضمانت وارنٹ جاری

ڈسٹرکٹ اینڈ سیشن کورٹس اسلام آباد نے وفاقی دارالحکومت کے ریاستی اداروں پر گمراہ کن الزامات عائد کرنے اور ان کی ساکھ کو نقصان پہنچانے کے کیس میں وزیراعلیٰ خیبرپختونخوا سہیل آفریدی کے ناقابلِ ضمانت وارنٹ گرفتاری جاری کر دیے ہیں۔ سینئر سول جج عباس شاہ نے کیس کی سماعت کے دوران وزیراعلیٰ کی مسلسل عدم حاضری پر برہمی کا اظہار کرتے ہوئے یہ فیصلہ سنایا۔ عدالت نے متعلقہ حکام کو حکم دیا ہے کہ سہیل آفریدی کو گرفتار کر کے عدالت میں پیش کیا جائے۔

واضح رہے کہ وزیراعلیٰ کے پی کے خلاف یہ مقدمہ فیڈرل انویسٹی گیشن ایجنسی (FIA) کے سائبر کرائم ونگ نے پیکا (PECA) ایکٹ کے تحت درج کر رکھا ہے۔ ان پر الزام ہے کہ انہوں نے مختلف پلیٹ فارمز پر ریاستی اداروں کے خلاف بے بنیاد اور من گھڑت الزامات لگا کر عوام میں بے چینی پھیلانے کی کوشش کی۔ عدالت نے اب کیس کی مزید سماعت 16 اپریل تک ملتوی کر دی ہے، اور پولیس کو وارنٹس کی تعمیل یقینی بنانے کی ہدایت کی گئی ہے۔ سیاسی حلقوں میں اس پیش رفت کو انتہائی اہم قرار دیا جا رہا ہے، کیونکہ اس سے وفاق اور صوبہ خیبرپختونخوا کے درمیان کشیدگی میں مزید اضافے کا خدشہ ہے۔