سانحہ 9 مئی کیسز: ویڈیو لنک فعال نہ ہونے پر سماعت ملتوی؛ علیمہ خان کا شناختی کارڈ بلاک ہونے پر حاضری سے استثنیٰ

راولپنڈی کی انسدادِ دہشت گردی عدالت میں سانحہ 9 مئی سے متعلق جی ایچ کیو (GHQ) گیٹ نمبر 4، آرمی میوزیم حملہ اور میٹرو بس اسٹیشن نذرِ آتش کرنے سمیت 11 مقدمات کی سماعت ہوئی۔ جج امجد علی شاہ کی سربراہی میں ہونے والی سماعت کے دوران عدالتی احکامات کے باوجود ویڈیو لنک سسٹم فعال نہ ہوسکا، جبکہ مقدمات کے گواہان بھی عدالت میں پیش نہیں ہوئے۔ عدالت نے چالان کی نقول کی فراہمی کا مرحلہ مکمل کرنے کی ہدایت کرتے ہوئے تمام مقدمات کی سماعت 28 اپریل تک ملتوی کر دی۔ سابق وفاقی وزیر شیخ رشید احمد نے عدالت میں حاضری دی، جس کے بعد تمام ملزمان کو واپس جانے کی اجازت دے دی گئی۔

سماعت کے موقع پر بانی پی ٹی آئی کے وکیل فیصل ملک نے میڈیا سے گفتگو کرتے ہوئے شکوہ کیا کہ بانی پی ٹی آئی سے ملاقات اور قانونی مشاورت کی اجازت نہیں دی جا رہی، جو کہ کیس کی تیاری کے لیے انتہائی ضروری ہے۔ دوسری جانب، 26 نومبر احتجاج کیس میں علیمہ خان کی حاضری معافی کی درخواست منظور کر لی گئی۔ وکیل نے عدالت کو آگاہ کیا کہ علیمہ خان کا شناختی کارڈ تاحال بلاک ہے جس کی وجہ سے ان کا سفر کرنا ممکن نہیں ہے۔ عدالت نے علیمہ خان کا مقدمہ 20 اپریل تک ملتوی کرتے ہوئے آئندہ تاریخ پر انہیں اور تفتیشی افسر کو طلب کر لیا ہے، ساتھ ہی ہدایت کی کہ آئندہ سماعت پر علیمہ خان پیش ہوں تاکہ وکیل آخری گواہ پر جرح مکمل کر سکیں۔