اعجاز چوہدری کو اسپتال منتقل کیے جانے کی خبر کی جیل حکام نے تردید کر دی

کوٹ لکھپت جیل لاہور کے حکام نے پاکستان تحریک انصاف کے سینئر رہنما اور سابق سینیٹر اعجاز چوہدری کے اسپتال منتقل کیے جانے سے متعلق سوشل میڈیا پر گردش کرنے والی خبروں کو بے بنیاد قرار دیتے ہوئے تردید کر دی ہے۔

سوشل میڈیا پر یہ دعویٰ کیا جا رہا تھا کہ اعجاز چوہدری کو طبیعت ناساز ہونے پر سخت سیکیورٹی میں جیل سے اسپتال منتقل کیا گیا ہے، تاہم جیل انتظامیہ کے مطابق ایسی کوئی منتقلی عمل میں نہیں آئی۔

اس حوالے سے ایک ویڈیو بھی گردش کررہی ہے ، جس میں انہیں اسپتال میں زیرعلاج دکھایا گیا ہے۔

حکام کا کہنا ہے کہ سوشل میڈیا پر پرانی ویڈیو اور غیر مصدقہ معلومات کو دوبارہ شیئر کر کے غلط تاثر پیدا کیا جا رہا ہے۔ اس حوالے سے زیر گردش ویڈیو میں انہیں اسپتال میں زیر علاج دکھایا گیا تھا، جسے موجودہ صورتحال سے جوڑا جا رہا ہے۔

یاد رہے کہ اعجاز چوہدری کو نو مئی دو ہزار تئیس کے واقعات کے بعد مختلف مقدمات میں گرفتار کیا گیا تھا، جن میں وہ دیگر سیاسی رہنماؤں کے ہمراہ مختلف کیسز میں سزا یافتہ ہیں۔

ذرائع کے مطابق اس سے قبل بھی ان کی طبیعت خراب ہونے پر انہیں اسپتال منتقل کیا گیا تھا، تاہم علاج کے بعد انہیں دوبارہ جیل منتقل کر دیا گیا تھا۔