اسلام آباد مذاکرات :  اسحاق ڈار کے مصر، سعودی عرب اور ترکیہ سے رابطے

نائب وزیرِاعظم و وزیرِ خارجہ اسحاق ڈار نے خطے میں امن و استحکام کے فروغ کے لیے سفارتی سرگرمیاں تیز کرتے ہوئے مصر، سعودی عرب اور ترکیہ کے وزرائے خارجہ سے ٹیلیفونک گفتگو کی ہے۔

ذرائع کے مطابق اسحاق ڈار نے مصری وزیر خارجہ بدر عبدالعاطی کو اسلام آباد مذاکرات اور پاکستان کی سفارتی کاوشوں سے آگاہ کیا۔ دونوں رہنماؤں نے اس بات پر اتفاق کیا کہ جنگ بندی کے وعدوں پر سختی سے عملدرآمد وقت کی اہم ضرورت ہے۔

سعودی وزیر خارجہ شہزادہ فیصل بن فرحان سے گفتگو کے دوران نائب وزیرِاعظم نے مذاکراتی عمل میں ہونے والی پیش رفت پر روشنی ڈالی اور کہا کہ خطے میں کشیدگی کے خاتمے کے لیے مکالمہ ہی واحد راستہ ہے۔

اسحاق ڈار نے اس عزم کا اظہار کیا کہ پاکستان سفارتی سطح پر اپنی کوششیں جاری رکھے گا اور تمام فریقین کے درمیان بات چیت کو آگے بڑھانے میں اپنا کردار ادا کرتا رہے گا۔

ترکیہ کے وزیر خارجہ ہاکان فیدان کے ساتھ گفتگو میں بھی خطے کی صورتحال اور مذاکراتی عمل زیر بحث آیا۔ ترک وزیر خارجہ نے ایران اور امریکہ مذاکرات میں پاکستان کے مثبت کردار کو سراہتے ہوئے انطالیہ سفارتی فورم میں شرکت کی دعوت دی۔

دونوں رہنماؤں نے اس بات پر زور دیا کہ خطے میں پائیدار امن کے لیے سفارتی عمل کا جاری رہنا انتہائی ضروری ہے۔