امریکی صدر ڈونلڈ ٹرمپ مذاکرات کی تفصیل سوشل میڈیا پر شیئر کردی

امریکی صدر ڈونلڈ ٹرمپ نے ایران کے ساتھ ہونے والے حالیہ مذاکرات کی تفصیلات جاری کرتے ہوئے کہا ہے کہ ایران نے آبنائے ہرمز کھولنے کا وعدہ کیا تھا مگر جان بوجھ کر اس پر عمل نہیں کیا، جس کے باعث دنیا بھر میں بے چینی پیدا ہوئی۔

سماجی رابطے کی ویب سائٹ پر اپنے بیان میں امریکی صدر کا کہنا تھا کہ ایران کی جانب سے بارودی سرنگیں بچھانے کے دعوے کیے جا رہے ہیں، حالانکہ ان کی بحری صلاحیت کو شدید نقصان پہنچ چکا ہے اور ان کے بیشتر وسائل تباہ ہو چکے ہیں۔ انہوں نے کہا کہ اگر سرنگیں بچھائی بھی گئی ہوں تو کوئی بھی جہاز مالک ایسا خطرہ مول لینے کو تیار نہیں ہوگا۔

ڈونلڈ ٹرمپ نے کہا کہ ایران کی ساکھ کو شدید دھچکا پہنچا ہے اور ان کے رہنماؤں کی عزت بھی متاثر ہوئی ہے۔ انہوں نے زور دیا کہ ایران فوری طور پر بین الاقوامی آبی گزرگاہ کو کھولنے کا عمل شروع کرے کیونکہ وہ عالمی قوانین کی خلاف ورزی کر رہا ہے۔

امریکی صدر نے پاکستان کی سول اور عسکری قیادت کی تعریف کرتے ہوئے کہا کہ اسلام آباد میں ہونے والی ملاقات کے حوالے سے انہیں مکمل بریفنگ دی گئی ہے۔ انہوں نے وزیراعظم شہباز شریف اور فیلڈ مارشل عاصم منیر کو غیر معمولی شخصیات قرار دیا۔

ٹرمپ کے مطابق ایران کے ساتھ مذاکرات طویل رہے اور تقریباً بیس گھنٹے تک جاری رہے، تاہم ایران اپنے جوہری عزائم ترک کرنے پر آمادہ نہیں ہوا۔ انہوں نے واضح کیا کہ ایران کو کسی صورت جوہری ہتھیار حاصل کرنے کی اجازت نہیں دی جائے گی۔