پیپلزپارٹی کراچی کے 3360 ارب روپے ہڑپ کرچکی ہے : امیر جماعت اسلامی منعم ظفر

امیر جماعت اسلامی کراچی منعم ظفر خان نے کہا ہے کہ پیپلزپارٹی نے کراچی کے 3360 ارب روپے ہڑپ کر لیے ہیں اور شہر کو بنیادی ترقی سے محروم رکھا گیا ہے۔

کراچی میں پریس کانفرنس کرتے ہوئے انہوں نے کہا کہ یہ سوال اہم ہے کہ اتنے بڑے فنڈز کے باوجود اس شہر پر ایک پیسہ بھی مؤثر طور پر خرچ نہیں کیا گیا۔ ان کا کہنا تھا کہ نوجوانوں کی امیدوں اور امنگوں کا سودا کیا گیا ہے۔

منعم ظفر خان نے لیاری کی صورتحال پر شدید تنقید کرتے ہوئے کہا کہ علاقے کو بنیادی سہولتوں سے محروم رکھا گیا ہے اور سندھ سولڈ ویسٹ مینجمنٹ بورڈ نے کراچی اور لیاری کو کچرا کنڈی میں تبدیل کر دیا ہے۔

انہوں نے سوال اٹھایا کہ لیاری کی 13 یونین کونسلز سے کتنا کچرا اٹھایا گیا اور وہاں ترقیاتی کام کیوں نہیں ہوئے۔

ان کا کہنا تھا کہ شہر کے لوگ متعلقہ اداروں سے مایوس ہو چکے ہیں اور بنیادی سہولتوں سے محروم ہیں۔