وزیراعظم شہباز شریف سے جے ڈی وینس کی ملاقات، تعمیری مذاکرات کے عزم کا خیرمقدم

اسلام آباد میں عالمی سفارت کاری کے بڑے معرکے کا آغاز ہو گیا ہے، جہاں وزیرِاعظم محمد شہباز شریف اور امریکہ کے نائب صدر جے ڈی وینس کے درمیان انتہائی اہم ملاقات ہوئی ہے۔ اس اعلیٰ سطحی ملاقات میں امریکی نائب صدر کے ہمراہ صدر ٹرمپ کے خصوصی ایلچی اسٹیو وٹکوف اور معروف شخصیت جیرڈ کشنر بھی موجود تھے، جبکہ پاکستانی وفد میں نائب وزیرِاعظم و وزیرِ خارجہ سینیٹر محمد اسحاق ڈار اور وفاقی وزیرِ داخلہ سید محسن رضا نقوی نے شرکت کی۔ ملاقات کے دوران دونوں ممالک کے رہنماؤں نے “اسلام آباد ٹاکس” کے حوالے سے تعمیری انداز میں مذاکرات کو آگے بڑھانے کے عزم کا اظہار کیا۔

شہباز شریف نے امریکی وفد سے گفتگو کرتے ہوئے کہا کہ یہ مذاکرات خطے میں دیرپا امن و استحکام کے قیام کی جانب ایک اہم سنگِ میل ثابت ہوں گے۔ انہوں نے اس بات پر زور دیا کہ پاکستان عالمی اور علاقائی سطح پر پائیدار امن کے حصول کے لیے تمام فریقین کے درمیان مخلصانہ سہولت کاری جاری رکھنے کا خواہاں ہے۔ وزیرِاعظم نے امریکی قیادت کی آمد کو سراہتے ہوئے امید ظاہر کی کہ ان مذاکرات کے مثبت نتائج نہ صرف مشرقِ وسطیٰ بلکہ عالمی معیشت اور سیاست پر بھی خوشگوار اثرات مرتب کریں گے۔امریکی نائب صدر جے ڈی وینس نے پاکستان کی میزبانی اور امن کی کوششوں کی تعریف کی، جبکہ جیرڈ کشنر کی موجودگی کو سفارتی حلقے انتہائی اہمیت کا حامل قرار دے رہے ہیں۔ ماہرین کا ماننا ہے کہ وزیرِاعظم ہاؤس میں ہونے والی یہ ملاقات اس بات کا ثبوت ہے کہ پاکستان ایک بار پھر عالمی سطح پر ‘امن کے مرکز’ (Peace Hub) کے طور پر ابھرا ہے اور تہران و واشنگٹن کے درمیان برف پگھلانے میں اسلام آباد کا کردار تاریخ ساز ثابت ہونے جا رہا ہے۔