1973ء کا آئین وفاق کی مضبوطی اور عوامی حقوق کا ضامن ہے

وزیراعلیٰ سندھ سید مراد علی شاہ نے یومِ دستورِ پاکستان کے موقع پر اپنے خصوصی پیغام میں 1973ء کے آئین کو وفاق کی مضبوطی اور عوامی حقوق کا اصل ضامن قرار دیا ہے۔ انہوں نے 10 اپریل 1973ء کو ملکی تاریخ کا ایک سنہری دن قرار دیتے ہوئے کہا کہ شہید ذوالفقار علی بھٹو نے قوم کو ایک متفقہ، جمہوری اور اسلامی آئین دے کر ملک کی بنیادوں کو استوار کیا۔ وزیراعلیٰ سندھ نے واضح کیا کہ پاکستان پیپلز پارٹی ہمیشہ سے آئین کی بالادستی پر یقین رکھتی ہے اور چیئرمین بلاول بھٹو زرداری کی قیادت میں اس کے تحفظ کے لیے جدوجہد جاری رہے گی۔

مراد علی شاہ نے اپنے بیان میں زور دیا کہ عوامی حاکمیت ہی آئینِ پاکستان کی بنیاد ہے، جو ہر شہری کو مساوی حقوق اور تحفظ فراہم کرتا ہے۔ ان کا کہنا تھا کہ عوام اور ریاست کے درمیان اعتماد کا رشتہ اسی آئین کی بدولت قائم ہے، اور قانون کی حکمرانی ہی ایک مضبوط ریاست کی اصل پہچان ہوتی ہے۔ وزیراعلیٰ سندھ نے مزید کہا کہ آئین کے مطابق انصاف کی فراہمی ریاست کی اولین ذمہ داری ہے اور شہریوں کا بھی یہ فرض ہے کہ وہ آئین کی پاسداری کریں، کیونکہ اسی کے تحفظ میں پاکستان کا مستقبل محفوظ ہے۔ انہوں نے اس عزم کا اعادہ کیا کہ مستحکم پاکستان کے لیے اداروں کی مضبوطی اور جمہوری اقدار کا فروغ ناگزیر ہے۔