عازمین حج کیلئے بڑی سہولت، لاہور ایئرپورٹ بھی روڈ ٹو مکہ منصوبے میں شامل

اس سال حج کے لیے لاہور کے علامہ اقبال انٹرنیشنل ایئرپورٹ کو بھی روڈ ٹو مکہ منصوبے میں شامل کر لیا گیا ہے، جس کے بعد اب لاہور سے جانے والے عازمین حج بھی اس سہولت سے مستفید ہو سکیں گے۔

اس سے قبل کراچی اور اسلام آباد کے ایئرپورٹس پہلے ہی اس منصوبے کا حصہ تھے۔ ذرائع کے مطابق لاہور ایئرپورٹ کو شامل کرنے کے لیے حکومت پاکستان کی کوششیں کامیاب ہو گئی ہیں۔

سعودی حکام نے لاہور ایئرپورٹ کی انتظامیہ کو اس فیصلے سے آگاہ کر دیا ہے۔

روڈ ٹو مکہ منصوبے کے تحت سعودی امیگریشن حکام کراچی، اسلام آباد اور لاہور سے روانہ ہونے والے عازمین حج کی امیگریشن پاکستان میں ہی مکمل کریں گے، جس کے بعد سعودی عرب پہنچنے پر عازمین کو دوبارہ امیگریشن کے مرحلے سے نہیں گزرنا ہوگا۔