سہیل آفریدی کو لاہور میں ڈرامہ کرنا تھا تو الحمرا ہال کھلوا دیتی: عظمیٰ بخاری

وزیرِ اطلاعات پنجاب عظمیٰ بخاری نے پاکستان تحریک انصاف کے رہنما سہیل آفریدی کے حالیہ طرزِ عمل اور بیانیے پر شدید تنقید کرتے ہوئے کہا ہے کہ اگر سہیل آفریدی کو صرف ڈرامہ ہی کرنا تھا تو وہ بتا دیتے، ان کے لیے الحمرا ہال کھلوا دیا جاتا۔ نجی ٹی وی کے پروگرام “نقطہ نظر” میں گفتگو کرتے ہوئے عظمیٰ بخاری نے دعویٰ کیا کہ سہیل آفریدی نے پولیس اہلکاروں کے ساتھ بدتمیزی کی، گالیاں دیں اور بعد ازاں خود اپنی مرضی سے پولیس وین میں سوار ہوئے۔ انہوں نے کہا کہ سہیل آفریدی کی جانب سے پہلے “اغوا” کا من گھڑت تاثر دیا گیا، تاہم نیوز چینلز پر نشر ہونے والی ویڈیوز نے سچائی واضح کر دی۔

عظمیٰ بخاری نے مزید بتایا کہ واقعے کے دوران سادہ لباس میں تعینات کانسٹیبل مقدس علی پر تشدد کیا گیا، جبکہ امن و امان کے قیام کے لیے سادہ لباس میں سیکیورٹی اہلکاروں کی تعیناتی ایک معمول کی کارروائی ہوتی ہے۔ انہوں نے پی ٹی آئی کی سٹریٹ موومنٹ کو آڑے ہاتھوں لیتے ہوئے الزام عائد کیا کہ یہ رہنما صرف ویڈیوز بنا کر خود کو مظلوم ظاہر کرتے ہیں اور کبھی ‘مذہب کارڈ’ تو کبھی ‘سلطان راہی’ جیسے ڈرامائی انداز اپناتے ہیں۔ وزیرِ اطلاعات نے وزیراعلیٰ پنجاب مریم نواز کے دورہِ لندن کی وضاحت کرتے ہوئے کہا کہ وزیراعلیٰ نے اپنے تمام تر سفر کے اخراجات خود برداشت کیے ہیں اور تمام ریکارڈ اور رسیدیں جلد میڈیا کے سامنے پیش کر دی جائیں گی۔