مکہ مکرمہ کو نشانہ بنانے کی کوشش، جمعۃ المبارک ’’یومِ مذمت‘‘ کے طور پر منانے کا اعلان

چیئرمین پاکستان علماء کونسل اور سیکرٹری جنرل انٹرنیشنل تعظیمِ حرمین شریفین کونسل حافظ محمد طاہر محمود اشرفی نے اعلان کیا ہے کہ آئندہ جمعۃ المبارک کو ملک بھر میں ’’یومِ مذمت‘‘ کے طور پر منایا جائے گا۔ یہ یومِ مذمت مکہ المکرمہ کو نشانہ بنانے کی مذموم کوششوں اور مملکتِ سعودی عرب کے مقدس مقامات پر حوثی باغیوں، ان کے حلیفوں اور سرپرستوں کے حملوں کے خلاف ریکارڈ کرایا جائے گا۔

لاہور میں پریس کانفرنس سے خطاب کرتے ہوئے حافظ محمد طاہر محمود اشرفی نے تمام مکاتبِ فکر کے علماء، مذہبی رہنماؤں، خطباء اور ائمہ کرام سے پرزور اپیل کی کہ وہ جمعہ کے خطبات میں ان حملوں کی شدید الفاظ میں مذمت کریں۔ انہوں نے زور دیا کہ علماء حرمین شریفین کی حرمت، سلامتی اور تحفظ کے حوالے سے امتِ مسلمہ کے متفقہ اور غیر متزلزل مؤقف کو دنیا کے سامنے اجاگر کریں۔ طاہر اشرفی نے کہا کہ مکہ المکرمہ اور مدینہ المنورہ تمام مسلمانوں کے ایمان و عقیدے کا مرکز ہیں اور ارضِ حرمین شریفین پوری امتِ مسلمہ کے لیے ایک واضح ‘ریڈ لائن’ ہے۔ انہوں نے مزید کہا کہ دنیا بھر کے دو ارب مسلمان سعودی عرب کی قیادت اور عوام کے ساتھ مکمل یکجہتی کے ساتھ کھڑے ہیں اور مقدس مقامات کے تحفظ پر کوئی سمجھوتہ نہیں کیا جائے گا۔