خیبر پختونخوا کیلئے 100 ایم ایم سی ایف ڈی گیس کی تخصیص کا مطالبہ

خیبر پختونخوا کے وزیر برائے توانائی و برقیات نذیر احمد عباسی نے اسلام آباد میں وفاقی وزیر پٹرولیم علی پرویز ملک سے ایک اہم ملاقات کی، جس میں وفاق اور صوبے کے درمیان توانائی، گیس اور بجلی کے زیرِ التوا امور پر تفصیلی بات چیت کی گئی۔ ملاقات کے دوران خیبر پختونخوا حکومت نے صوبے کی صنعتی پیشرفت اور معاشی بحالی کو یقینی بنانے کے لیے صوبائی صنعتی شعبے کے لیے 100 ایم ایم سی ایف ڈی (MMCFD) گیس کی فوری تخصیص کا باضابطہ مطالبہ کیا۔

صوبائی وزیر نذیر احمد عباسی نے زور دیا کہ صوبے کے گیس پیدا کرنے والے اضلاع میں گیس کنکشن کی فی صارف لاگت کے مروجہ معیار کا ازسرنو تعین کیا جائے۔ اس کے ساتھ ہی انہوں نے ‘ایل پی جی پالیسی 2016’ کا حوالہ دیتے ہوئے مطالبہ کیا کہ خیبر پختونخوا کے پہاڑی اور جنگلاتی علاقوں میں قدرتی ماحول اور جنگلات کو کٹاؤ سے بچانے کے لیے 10 فیصد ایل پی جی (LPG) گیس کا کوٹہ صوبے کے لیے خصوصاً مختص کیا جائے۔ وفاقی وزیر پٹرولیم نے صوبائی مطالبات کو ہمدردانہ غور اور باہمی مشاورت سے حل کرنے کا اعادہ کیا۔