اسلام آباد مذاکرات: غیر ملکی صحافیوں کے لیے نئی ایس او پیز جاری؛ ایران اور امریکہ کے میڈیا کو ‘ویزہ آن ارائیول’ کی سہولت

وفاقی حکومت نے اسلام آباد میں ہونے والے اہم مذاکرات کی کوریج کے لیے آنے والے بین الاقوامی صحافیوں اور میڈیا نمائندگان کے حوالے سے نئی ضابطہ کار (ایس او پیز) جاری کر دی ہیں۔ ترجمان دفترِ خارجہ کے مطابق، ان مذاکرات کی اہمیت کو مدنظر رکھتے ہوئے کوریج کے عمل کو سہل اور منظم بنانے کے لیے خصوصی اقدامات کیے گئے ہیں۔ نئی پالیسی کے تحت، ‘ویزہ آن ارائیول’ (پاکستان پہنچنے پر ویزہ کے حصول) کی سہولت صرف ان میڈیا نمائندگان کو حاصل ہوگی جن کا تعلق امریکہ اور ایران سے ہے۔

ترجمان نے مزید واضح کیا کہ دیگر ممالک سے تعلق رکھنے والے صحافیوں کو مروجہ طریقہ کار کے مطابق ویزہ حاصل کرنا ہوگا، تاہم امریکہ اور ایران کے صحافیوں کو یہ رعایت مذاکرات کی حساسیت اور ان ممالک کی براہِ راست دلچسپی کے باعث دی گئی ہے۔ حکومت کی جانب سے جاری کردہ ان ایس او پیز کا مقصد مذاکرات کے دوران سکیورٹی اور سفارتی پروٹوکول کو یقینی بنانا ہے تاکہ عالمی میڈیا ان اہم مذاکرات کی رپورٹنگ کسی رکاوٹ کے بغیر کر سکے۔