حنا جاوید قتل کیس: گھریلو ملازم کی درخواست ضمانت پر سماعت ملتوی

ماڈل و اداکارہ حنا جاوید کے قتل کیس میں نامزد ملزم اور گھریلو ملازم ذیشان ارشد کی بعد از گرفتاری درخواستِ ضمانت پر سماعت ایڈیشنل ڈسٹرکٹ اینڈ سیشن جج نصیر احمد کے روبرو ہوئی۔ سماعت کے دوران اس وقت عجیب صورتِ حال پیدا ہو گئی جب ملزم ذیشان ارشد کی جانب سے دو مختلف وکلاء، سردار حمزہ عباسی اور جنید حسن نے عدالت میں الگ الگ وکالت نامے اور مستقل ضمانت کی علیحدہ علیحدہ درخواستیں جمع کرائیں۔

کیس کی سماعت کے دوران ڈپٹی ڈسٹرکٹ پراسیکیوٹر رحمان شوکت بھٹی اپنی لیگل ٹیم کے ہمراہ عدالت میں پیش ہوئے۔ فاضل عدالت نے دوہرے وکالت ناموں اور درخواستوں کی موجودگی پر ملزم کی جانب سے دائر کی گئی پہلی درخواستِ ضمانت پر مزید کارروائی آئندہ تاریخ تک ملتوی کر دی۔ عدالت نے مقدمے کی سماعت 19 ستمبر تک ملتوی کرتے ہوئے مدعیِ مقدمہ فہد جاوید، پراسیکیوشن اور متعلقہ پولیس کو 19 ستمبر کی صبح 8 بجے عدالت میں پیش ہونے کے لیے سمن جاری کر دیے ہیں۔