20 ستمبر کو اسلام آباد مارچ کا اعلان,امیر جماعت اسلامی حافظ نعیم الرحمٰن

امیر جماعت اسلامی حافظ نعیم الرحمٰن نے کہا ہے کہ جماعت اسلامی اور حکومتی ٹیم کے درمیان مذاکرات کے دوران پیٹرولیم لیوی کے مکمل خاتمے اور شرحِ سود میں کمی کی واضح تجاویز پیش کی گئی ہیں۔ اپنے ایک پریس کانفرنس اور احتجاجی بیان میں انہوں نے حکومت کو آڑے ہاتھوں لیتے ہوئے کہا کہ عالمی مارکیٹ میں تیل کی قیمتوں میں کمی کے باوجود عوام کو ریلیف نہیں دیا جا رہا، حالانکہ حکومت نے گزشتہ سال لیوی کی مد میں 15 ارب روپے سے زائد کی رقم کمائی۔ انہوں نے کہا کہ سٹیٹ بینک آف پاکستان کی جانب سے شرحِ سود کو برقرار رکھنا انتہائی افسوسناک ہے کیونکہ سود کی وجہ سے ملکی قرضوں کے بوجھ میں مزید اضافہ ہوگا۔

حافظ نعیم الرحمٰن نے حکمران اتحاد بالخصوص شریف خاندان پر شدید تنقید کرتے ہوئے کہا کہ حکومت عوام کو ریلیف دینے کا دعویٰ کرتی ہے لیکن کروڑوں روپے اشتہارات اور نمائش پر ضائع کر دیے جاتے ہیں۔ انہوں نے وزیراعلیٰ پنجاب مریم نواز پر اعتراض اٹھاتے ہوئے الزام عائد کیا کہ ایک طرف صوبے میں تعلیمی نتائج بگڑ رہے ہیں اور نویں جماعت کے بچے فیل ہو رہے ہیں، تو دوسری جانب حکمران سرکاری وسائل اور اربوں روپے کے جہاز ذاتی دوروں کے لیے استعمال کر رہے ہیں۔ انہوں نے کہا کہ بیوروکریسی اور حکمرانوں کی شاہ خرچیاں ختم ہونے کا نام نہیں لے رہیں جہاں سیکرٹریز لاکھوں روپے میٹنگ الائونسز لے رہے ہیں اور بیرونِ ملک بزنس کلاسز اور لگژری گاڑیوں میں سفر جاری ہے۔

امیر جماعت اسلامی نے حکومت کو تجویز دی کہ عام عوام پر بوجھ ڈالنے کے بجائے لگژری گاڑیوں اور اشرافیہ پر ڈیوٹی ڈبل کی جائے۔ انہوں نے کہا کہ اس وقت ملک بھر میں 40 سے زائد مقامات پر جماعت اسلامی کے دھرنے جاری ہیں اور عوام کنٹینرز یا گرفتاریوں سے ڈرنے والے نہیں ہیں۔ حافظ نعیم الرحمٰن نے اعلان کیا کہ جماعت اسلامی 20 ستمبر کو اسلام آباد کی جانب تاریخی مارچ کرے گی اور جب تک مطالبات منظور نہیں ہوتے احتجاج ختم نہیں ہوگا۔ اس کے علاوہ انہوں نے سندھ حکومت کے بلدیاتی نظام اور نامزد کردہ ایڈمنسٹریٹرز کو بھی مکمل طور پر مسترد کر دیا۔