ملک میں جاگیرداروں اور وڈیروں کا راج، غریبوں پر ٹیکسز بڑھا ر ہے: حافظ نعیم الرحمان

امیر جماعت اسلامی حافظ نعیم الرحمن نے کراچی میں دھرنے کے شرکاء سے خطاب کرتے ہوئے کہا ہے کہ ملک میں جاگیرداروں اور وڈیروں کا راج قائم ہے جو غریبوں اور متوسط طبقے پر ٹیکسوں کا بوجھ بڑھا رہے ہیں۔ انہوں نے کہا کہ جماعت اسلامی کی جدوجہد کسی فرد یا پارٹی کے خلاف نہیں بلکہ اس ظالمانہ معاشی نظام کی تبدیلی کے لیے ہے جس نے عوام کا جینا دو بھر کر دیا ہے۔ انہوں نے انکشاف کیا کہ آئی پی پیز (IPPs) پاکستان میں ٹیکس ادا نہیں کرتیں جبکہ عوام پر مہنگی بجلی کے بم گرائے جا رہے ہیں۔ بلوچستان سمیت ملک کے 20 سے زائد مقامات پر ہونے والے دھرنوں اور عوامی تحریک کو سراہتے ہوئے انہوں نے دھرنے کے شرکاء کو مبارکباد پیش کی۔

حافظ نعیم الرحمن نے کسانوں کی ابتر صورتحال کا ذکر کرتے ہوئے کہا کہ کسان سے گندم 2200 روپے فی من خریدی جاتی ہے جبکہ مارکیٹ میں وہی گندم 5 ہزار روپے میں فروخت کی جا رہی ہے، جبکہ شوگر ملز مافیا بھی درآمد اور برآمد کے نام پر لوٹ مار میں مصروف ہے۔ انہوں نے وزیراعلیٰ پنجاب مریم نواز کی تعلیمی پالیسیوں پر شدید تنقید کرتے ہوئے الزام عائد کیا کہ صوبے میں تعلیمی نظام کی زبوں حالی کے باعث نویں جماعت کے طلبہ کی بڑی تعداد فیل ہو رہی ہے، جبکہ انہوں نے ‘مریم طیارہ کیس’ کو دوبارہ کھولنے کا مطالبہ بھی کیا۔ اس کے علاوہ انہوں نے گزشتہ 18 برسوں سے اقتدار میں موجود سندھ حکومت کی کارکردگی کو بھی شدید تنقید کا نشانہ بنایا۔