قانون ہاتھ میں نہیں لیں گے، ریاست سب سے پہلے ہے: بیرسٹر گوہر

پاکستان تحریک انصاف (پی ٹی آئی) کے چیئرمین بیرسٹر گوہر علی خان نے کہا ہے کہ پی ٹی آئی ایک جمہوری و سیاسی قوت ہے اور ہم قانون کو کبھی ہاتھ میں نہیں لیں گے کیونکہ ہمارے لیے پاکستان اور ریاست سب سے پہلے ہیں۔ پشاور میں پریس کانفرنس کرتے ہوئے ان کا کہنا تھا کہ ملک مزید تشدد کا متحمل نہیں ہو سکتا، اقتدار میں موجود طبقے کو عوام کے جذبات کا احساس کرنا چاہیے۔ انہوں نے وضاحت کی کہ تحریک انصاف اسلام آباد پر چڑھائی کرنے نہیں جا رہی، اور جب بھی اسلام آباد جائیں گے تو ہاتھ میں پاکستان کا جھنڈا اور بانی پی ٹی آئی کے نعرے ہوں گے۔

پریس کانفرنس کے دوران بیرسٹر گوہر نے گرفتاریوں پر سخت تشویش کا اظہار کرتے ہوئے بتایا کہ خیبرپختونخوا میں وزرا، ارکانِ اسمبلی اور تقریباً 1500 سے زائد کارکنوں کو گرفتار کیا جا چکا ہے۔ انہوں نے حکومتی رویے پر سوال اٹھاتے ہوئے کہا کہ پی ٹی آئی کے کارکنان کو دہشت گردوں کی طرح ٹریٹ کرنے کی باتیں کر کے اکسایا جا رہا ہے، جبکہ ہم صرف آئینی و جمہوری انداز میں اپنے حقوق اور بانی پی ٹی آئی کے مقدمات میں شفاف انصاف کے لیے آواز اٹھا رہے ہیں۔ انہوں نے مطالبہ کیا کہ عدالتی فیصلوں پر فوری عملدرآمد کیا جائے اور سیاسی انتقام کا سلسلہ بند کیا جائے۔