سکیورٹی فورسز کی کامیاب کارروائیاں امن دشمنوں کیلئے واضح پیغام ہیں: وزیراعلیٰ بلوچستان

وزیراعلیٰ بلوچستان میر سرفراز بگٹی نے پشین اور قلعہ عبداللہ میں قانون نافذ کرنے والے اداروں کی جانب سے دہشت گردوں کے خلاف کی گئی کامیاب عسکری کارروائیوں کو امن دشمنوں کے لیے ایک واضح پیغام قرار دیا ہے۔ انہوں نے بتایا کہ کلی سلطان، اژرم، دینار اور گیلو کے علاقوں میں انٹیلی جنس معلومات کی بنیاد پر کیے گئے مؤثر آپریشنز میں “فتنہ الہندوستان” کے 6 دہشت گرد ہلاک جبکہ 5 کو گرفتار کر لیا گیا ہے، جو سیکیورٹی فورسز اور کاؤنٹر ٹیررازم ڈیپارٹمنٹ (سی ٹی ڈی) کی بڑی کامیابی ہے۔

سرفراز بگٹی نے کہا کہ دہشت گردوں کے قبضے سے بھاری مقدار میں اسلحہ اور دھماکہ خیز مواد برآمد ہوا ہے، جبکہ گرفتار عناصر سے تفتیش کے نتیجے میں سہولت کاروں اور پورے نیٹ ورک سے متعلق اہم معلومات حاصل کی جا رہی ہیں۔ انہوں نے واضح کیا کہ فتنہ الہندوستان اور فتنہ الخوارج کے ملک دشمن عناصر اور ان کے مددگاروں کے خلاف کارروائیوں میں کوئی نرمی نہیں برتی جائے گی۔ وزیراعلیٰ بلوچستان نے بلوچستان پولیس اور دیگر حساس اداروں کی پیشہ ورانہ صلاحیتوں کو سراہتے ہوئے عزم ظاہر کیا کہ صوبے میں پائیدار امن کے قیام اور عوام کے جان و مال کے تحفظ کے لیے آخری دہشت گرد کے خاتمے تک جنگ جاری رہے گی۔