آزاد کشمیر کے صدارتی انتخاب کا شیڈول جاری، پولنگ 24 ستمبر کو ہوگی

آزاد جموں و کشمیر کے الیکشن کمیشن نے ریاست میں نئے صدر کے انتخاب کا باضابطہ شیڈول جاری کر دیا ہے، جس کے تحت صدارتی الیکشن کے لیے پولنگ 24 ستمبر 2026ء کو ہوگی۔ مظفرآباد میں پریس کانفرنس کرتے ہوئے چیف الیکشن کمشنر جسٹس (ر) غلام مصطفیٰ مغل نے اعلان کیا کہ صدارتی امیدوار 19 ستمبر کو صبح 10 سے دوپہر 12 بجے تک اپنے کاغذات نامزدگی جمع کرا سکیں گے۔

الیکشن کمیشن کے شیڈول کے مطابق کاغذات نامزدگی کی جانچ پڑتال 19 ستمبر کو ہی کی جائے گی، جبکہ امیدوار 23 ستمبر کی صبح 11:30 بجے تک اپنے کاغذات واپس لے سکیں گے۔ چیف الیکشن کمشنر آزاد کشمیر صدارتی انتخاب کے لیے ریٹرننگ افسر کی ذمہ داریاں سرانجام دیں گے۔

چیف الیکشن کمشنر نے بتایا کہ پولنگ 24 ستمبر کو صبح 10 سے دوپہر ایک بجے تک آزاد جموں و کشمیر قانون ساز اسمبلی ہال میں ہوگی، جس کے فوراً بعد ووٹوں کی گنتی کی جائے گی۔ اس موقع پر جسٹس (ر) غلام مصطفیٰ مغل نے قائم مقام صدر آزاد کشمیر سے درخواست کی ہے کہ صدارتی انتخاب کی کارروائی مکمل کرنے کے لیے 24 ستمبر کو قانون ساز اسمبلی کا خصوصی اجلاس طلب کیا جائے۔