رجب بٹ سمیت چار افراد کے خلاف این سی سی آئی اے میں درخواست دائر

معروف یوٹیوبر رجب بٹ سمیت چار دیگر یوٹیوبرز کے خلاف نیشنل سائبر کرائم انویسٹی گیشن ایجنسی (NCCIA) میں درخواست دائر کر دی گئی ہے۔ درخواست میں مؤقف اختیار کیا گیا ہے کہ ملزمان نے ڈکی بھائی کے بھائی منیب کو اغواء کرنے کی منصوبہ بندی کی۔

درخواست کے مطابق، ملزمان میں حیدر علی، مان ڈوگر اور رجب بٹ شامل ہیں، جنہوں نے رجب بٹ کی گاڑی میں منیب کو زبردستی اغواء کیا۔ منیب کے منہ پر سیاہ کپڑا ڈالا گیا، اسے گاڑی میں قید کیا گیا اور بعد میں مرغیوں کے پنجرے میں بند کر دیا گیا۔ پورے واقعے کی ویڈیو حیدر علی نے ریکارڈ کی اور بعد میں سوشل میڈیا پر وائرل کر دی گئی۔

درخواست گزار کا مؤقف ہے کہ ڈکی بھائی نے قانونی کارروائی کے بجائے خود جا کر اپنے بھائی کو بازیاب کروایا اور اس عمل کی ویڈیو بھی سوشل میڈیا پر اپلوڈ کی گئی۔ درخواست میں کہا گیا ہے کہ ایسی وائرل ویڈیوز معاشرے میں لاقانونیت، تشدد اور انتہا پسندی کو فروغ دیتی ہیں، خاص طور پر بچوں اور نوجوانوں کے لیے یہ گمراہ کن ہیں۔

مزید کہا گیا کہ ملزمان کے اقدامات عوامی اخلاقیات کے منافی، امن و امان کے لیے سنگین خطرہ اور ملکی قوانین کی خلاف ورزی ہیں، اور یہ قابلِ سزا جرائم کے زمرے میں آتے ہیں۔