عید کے لباس پر تنقید کے بعد علی ظفر نے قوم سے معافی مانگ لی

لاہور: پاکستان کے معروف گلوکار اور اداکار علی ظفر نے عید کے موقع پر اپنے لباس اور انداز پر ہونے والی تنقید کا جواب ایک منفرد اور طنزیہ انداز میں دیا ہے۔ علی ظفر نے سوشل میڈیا پر جاری اپنے پیغام میں قوم سے “معافی” مانگتے ہوئے کہا ہے کہ وہ مستقبل میں اس طرح کی “سنگین غلطی” نہ دہرانے کی پوری کوشش کریں گے۔

علی ظفر نے اپنے پیغام میں طنز کا سہارا لیتے ہوئے لکھا کہ وہ اس بات پر نادم ہیں کہ انہوں نے بغیر بنیان کے کرتا پہنا اور روایتی اجرک و دھوتی زیب تن کر کے پودوں کو پانی دینے کا “نہایت سنجیدہ فعل” انجام دیا۔ ان کا مزید کہنا تھا کہ وہ سمجھتے ہیں کہ یہ حالیہ دنوں میں سب کی زندگیوں پر اثر انداز ہونے والا ایک “انتہائی اہم قومی اور عالمی مسئلہ” رہا ہے، لہٰذا وہ اس پر توجہ دلانے کے لیے صارفین کے مشکور ہیں۔

اداکارہ ندا یاسر کے عید لُک پر ہونے والی حالیہ تنقید کے تناظر میں، علی ظفر کے اس بیان کو سوشل میڈیا ٹرولنگ کے خلاف ایک دلچسپ احتجاج کے طور پر دیکھا جا رہا ہے۔ جہاں کچھ صارفین ان کے اس مزاحیہ انداز کو پسند کر رہے ہیں، وہیں کچھ کا ماننا ہے کہ فنکاروں کو عوامی جذبات اور روایات کا احترام کرنا چاہیے۔