علی ظفر کے میشا شفیع کیخلاف ہتک عزت کے دعویٰ کی کارروائی مکمل

لاہور: ایڈیشنل سیشن جج آصف حیات کی عدالت میں گلوکار علی ظفر کی جانب سے گلوکارہ میشا شفیع کے خلاف دائر کردہ 100 کروڑ روپے کے ہتکِ عزت کے دعوے کی سماعت مکمل ہو گئی ہے۔ عدالت میں فریقین کے وکلاء نے اپنے حتمی زبانی اور تحریری دلائل پیش کر دیے ہیں، جس کے بعد کیس کا فیصلہ کن مرحلہ قریب آ گیا ہے۔

سماعت کے دوران جج آصف حیات نے ریمارکس دیے کہ اگر 30 مارچ کو کسی قانونی نکتے پر مزید معاونت کی ضرورت پڑی تو وکلاء سے رجوع کیا جائے گا، بصورتِ دیگر اسی تاریخ کو فیصلے کے اعلان کا دن مقرر کر دیا جائے گا۔ علی ظفر نے یہ دعویٰ 2018 میں اس وقت دائر کیا تھا جب میشا شفیع نے ان پر جنسی ہراسانی کے الزامات عائد کیے تھے، جسے علی ظفر نے اپنی ساکھ کو نقصان پہنچانے کی مہم قرار دیا تھا۔

واضح رہے کہ یہ کیس پاکستانی شوبز انڈسٹری کا سب سے طویل اور ہائی پروفائل ہتکِ عزت کا مقدمہ بن چکا ہے، جس میں اب تک درجنوں گواہان کے بیانات ریکارڈ کیے گئے اور متعدد مرتبہ اعلیٰ عدالتوں سے بھی رجوع کیا گیا۔ اب سب کی نظریں 30 مارچ پر لگی ہیں جب عدالت اس تاریخی کیس کے فیصلے کی تاریخ کا اعلان کرے گی۔