ہتک عزت کیس: عدالت نے میشا شفیع کو 50 لاکھ جرمانہ کر دیا

لاہور: لاہور کی ایڈیشنل سیشن عدالت نے معروف گلوکار علی ظفر کی جانب سے دائر 100 کروڑ روپے کے ہتکِ عزت کے دعوے پر آٹھ سال بعد تاریخی فیصلہ سنا دیا ہے۔ ایڈیشنل سیشن جج آصف حیات نے مختصر فیصلہ سناتے ہوئے میشا شفیع کی جانب سے علی ظفر پر لگائے گئے ہراسانی کے الزامات کو مسترد کر دیا اور انہیں 50 لاکھ روپے جرمانہ ادا کرنے کا حکم دیا۔

عدالتی ریکارڈ کے مطابق، اس کیس کی کارروائی 8 سال تک جاری رہی، جس کے دوران 9 ججز تبدیل ہوئے اور مجموعی طور پر 283 پیشیاں بھگتی گئیں۔ کیس کے دوران دونوں جانب سے 20 گواہوں کے بیانات قلمبند کیے گئے۔ عدالت نے اپنے فیصلے میں میشا شفیع کے دعوے کو ‘ڈگری’ کرتے ہوئے قرار دیا کہ الزامات ثابت نہ ہونے کی صورت میں مدعی کی ساکھ کو پہنچنے والے نقصان کا ازالہ ضروری ہے۔

واضح رہے کہ یہ تنازع 2018 میں اس وقت شروع ہوا تھا جب میشا شفیع نے سوشل میڈیا پر علی ظفر پر جنسی ہراسانی کے الزامات عائد کیے تھے، جس کے جواب میں علی ظفر نے اپنی ساکھ کو نقصان پہنچانے پر ہتکِ عزت کا دعویٰ دائر کیا تھا۔ قانونی ماہرین اس فیصلے کو پاکستان میں ہتکِ عزت کے قوانین اور سوشل میڈیا پر لگائے جانے والے الزامات کے حوالے سے ایک اہم نظیر قرار دے رہے ہیں۔