اقتصادی تعاون تنظیم کے وزرائے خارجہ کا اجلاس آج اسلام آباد میں شروع ہوگا

اقتصادی تعاون تنظیم (ای سی او – ECO) کے وزرائے خارجہ کا اہم دو روزہ اجلاس آج سے پاکستان کے دارالحکومت اسلام آباد میں شروع ہو رہا ہے، جس کی صدارت پاکستان کے نائب وزیراعظم اور وزیر خارجہ اسحاق ڈار کریں گے۔

اس دو روزہ وزرائے خارجہ اجلاس کے دوران علاقائی تجارت کے فروغ، توانائی، ٹرانسپورٹ کے نظام، اور وسطی ایشیا کے خطے کو عالمی منڈیوں کے ساتھ مؤثر طریقے سے جوڑنے کے لیے ایک مشترکہ اور جامع حکمت عملی پر تفصیلی غور کیا جائے گا۔ سفارتی ذرائع کے مطابق ایرانی وزیر خارجہ عباس عراقچی بھی اس اہم اجلاس میں شرکت کے لیے خصوصی طور پر تشریف لارہے ہیں، جبکہ ترک جمہوریہ شمالی قبرص کے وزیر خارجہ تحسین ارطغرل اوغلو پہلے ہی اسلام آباد پہنچ چکے ہیں۔

ذرائع کے مطابق تاجکستان اور ایران سمیت مختلف رکن ممالک کے وزرائے خارجہ اس اجلاس میں ذاتی طور پر شریک ہوں گے، جبکہ کرغزستان اور قازقستان کی اعلیٰ سطح کی نمائندگی ان کے نائب وزرائے خارجہ کریں گے، اسی طرح ترکیہ کی جانب سے نائب وزیر خارجہ اجلاس میں شرکت کریں گے۔ تاہم، ضابطے کے مطابق افغان وزیر خارجہ کو اس اجلاس میں شرکت کی دعوت نہیں دی گئی۔

نائب وزیراعظم و وزیر خارجہ اسحاق ڈار اجلاس کی افتتاحی تقریب سے کلیدی خطاب کریں گے، جبکہ ای سی او کے سیکرٹری جنرل سفیر اسد مجید خان اور دیگر رکن ممالک کے وزرائے خارجہ بھی تقریب سے خطاب کرتے ہوئے اپنے خیالات کا اظہار کریں گے۔ اجلاس کے ایجنڈے میں رکن ممالک کے باہمی اقتصادی و تجارتی روابط کا فروغ، علاقائی رابطہ کاری، توانائی کے شعبے میں اشتراک، اور ٹرانسپورٹ کے بنیادی ڈھانچے کو جدید خطوط پر استوار کرنے کے امور سرفہرست ہیں۔

علاوہ ازیں، دورے پر آنے والے غیر ملکی وزرائے خارجہ کی وزیراعظم پاکستان شہباز شریف سے ملاقات بھی متوقع ہے، اور مہمان شخصیات کے اعزاز میں خصوصی ظہرانے کا اہتمام بھی کیا گیا ہے۔ واضح رہے کہ اقتصادی تعاون تنظیم (ECO) کل 10 رکن ممالک اور 3 مبصرین پر مشتمل ہے، اور پاکستان میں منعقد ہونے والے اس اعلیٰ سطحی اجلاس کو خطے میں اقتصادی یکجہتی اور تجارتی تعاون کے فروغ کے لیے ایک سنگِ میل قرار دیا جا رہا ہے