اقوام متحدہ کے سیکرٹری جنرل انتونیو گوتریس کو نشانِ امتیاز عطا کردیا گیا

صدرِ مملکت آصف علی زرداری نے اقوامِ متحدہ کے سیکرٹری جنرل انتونیو گوٹیرس کو عالمی امن، مظلوم قوموں کی حمایت اور بالخصوص پاکستان میں قدرتی آفات کے دوران شاندار خدمات کے اعتراف میں ملک کے اعلٰی ترین شہری اعزاز نشانِ امتیاز سے نوازا ہے۔ ایوانِ صدر اسلام آباد میں منعقدہ پروقار تقریبِ پذیرائی میں صدر آصف علی زرداری نے اقوامِ متحدہ کے سربراہ کو اس اعزاز سے سرفراز کیا۔

تقریب میں وزیراعظم محمد شہباز شریف، نائب وزیراعظم و وزیر خارجہ اسحاق ڈار، وفاقی وزیر خزانہ محمد اورنگزیب، اسپیکر قومی اسمبلی سردار ایاز صادق سمیت وفاقی کابینہ کے ارکان، اعلیٰ سول و عسکری حکام اور مختلف ممالک کے سفیروں نے بڑی تعداد میں شرکت کی۔ تلاوتِ کلامِ پاک سے شروع ہونے والی اس خاص تقریب میں انتونیو گوٹیرس کی بین الاقوامی سفارت کاری، تنازعات کے پرامن حل اور اقوامِ متحدہ کے ایجنڈے کو آگے بڑھانے کے لیے کاوشوں کو بھرپور خراجِ تحسین پیش کیا گیا۔