کرتارپور میں بابا گورو نانک کی 487ویں برسی کی تین روزہ تقریبات کا آخری روز

گوردوارہ دربار صاحب کرتارپور میں سکھ مذہب کے بانی بابا گورو نانک دیو جی کی 487 ویں برسی (جوتی جوت) کی تین روزہ تقریبات کا آج آخری روز ہے۔ اس موقع پر مذہبی رسومات، اکنڈ پاٹھ، متبادل عبادات اور سکھ یاتریوں کی حاضری کا سلسلہ پورے مذہبی جوش و خروش کے ساتھ جاری ہے۔ دنیا بھر اور پاکستان سے آئے ہوئے سکھ یاتری دربار صاحب پر حاضری دے رہے ہیں، جبکہ لنگر ہال میں یاتریوں کے لیے بہترین اور مختلف نوعیت کے کھانوں و چائے کا خصوصی مفت اہتمام کیا گیا ہے۔

دو روزہ قیام کے بعد تمام یاتری آج مذہبی تقریبات کے باقاعدہ اختتام پر اپنے متعلقہ علاقوں کی جانب واپس روانہ ہوں گے۔ تاہم، سرحد پار سے بھارتی یاتری راہداری (کرتارپور راہداری) نہ کھلنے کی وجہ سے تقریبات میں شرکت کے لیے کرتارپور نہ پہنچ سکے۔ تقریب میں موجود یاتریوں نے بہترین سیکیورٹی، رہائش اور مہمان نوازی پر حکومتِ پاکستان اور متروکہ وقف املاک بورڈ کا شکریہ ادا کیا ہے۔