این سی سی آئی اے کی غیرقانونی کال سینٹر پر کارروائی،17 غیر ملکیوں سمیت 100 افراد زیر حراست

وفاقی دارالحکومت اسلام آباد میں نیشنل سائبر کرائم انویسٹی گیشن ایجنسی (NCCIA) نے ایک بڑی کارروائی کرتے ہوئے غیر قانونی کال سینٹر پر چھاپہ مار کر 17 غیر ملکیوں سمیت 100 افراد کو حراست میں لے لیا ہے۔ ترجمان این سی سی آئی اے کے مطابق، اس غیر قانونی کال سینٹر سے غیر اخلاقی موبائل ایپلیکیشنز چلانے اور بھارت اور برازیل جیسے ممالک میں فنانشل اسکام (مالیاتی فراڈ) اور آن لائن اسکیمیں چلانے کے ٹھوس شواہد برآمد ہوئے ہیں۔

این سی سی آئی اے کے ترجمان نے بتایا کہ چھاپے کے دوران کال سینٹر کی عمارت کو فوری طور پر سیل کر دیا گیا ہے جبکہ وہاں موجود تمام ڈیجیٹل ڈیٹا، کمپیوٹرز اور الیکٹرانک گیجٹس کو این سی سی آئی اے نے اپنی تحویل میں لے لیا ہے۔ ایجنسی حکام کا کہنا ہے کہ ملک بھر میں سائبر کرائم اور مالیاتی فراڈ میں ملوث تمام غیر قانونی کال سینٹرز کے خلاف کریک ڈاؤن جاری ہے اور اس نیٹ ورک کے خلاف سخت قانونی کارروائی کی جا رہی ہے۔