پنجاب میں سی ٹی ڈی کے 158 انٹیلی جنس بیسڈ آپریشنز، 23 دہشت گرد گرفتار

پنجاب میں کاؤنٹر ٹیررازم ڈیپارٹمنٹ (سی ٹی ڈی) نے گزشتہ ایک ماہ کے دوران صوبے بھر میں بڑی سیکیورٹی کارروائیاں کرتے ہوئے ۲۳ خطرناک دہشت گردوں کو گرفتار کر لیا ہے۔ ترجمان سی ٹی ڈی کے مطابق یہ تمام گرفتاریاں ۱۵۸ انٹیلی جنس بیسڈ آپریشنز (IBOs) کے دوران عمل میں آئیں۔ ان آپریشنز کے دوران ساہیوال سے بھارتی خفیہ ایجنسی ‘را’ (RAW) کا ایک انتہائی خطرناک دہشت گرد بھی پکڑا گیا ہے، جبکہ دیگر گرفتار ملزمان کی شناخت ہدایت اللہ، محمد مجاہد، تسلیم حسنین اور طارق اللہ کے نام سے ہوئی ہے۔

ترجمان کے مطابق گرفتار کیے گئے دہشت گردوں کے قبضے سے بھاری مقدار میں دھماکہ خیز مواد، ۷ آئی ای ڈیز (IEDs)، ۲۶ ڈیٹونیٹرز اور ۴۸ فٹ فیوز وائر برآمد کر لی گئی ہے۔ سیکیورٹی حکام نے ان تمام ملزمان کے خلاف مختلف تھانوں میں ۲۲ مقدمات درج کر کے مزید قانونی اور تفتیشی کارروائی شروع کر دی ہے۔

ترجمان سی ٹی ڈی نے مزید بتایا کہ سیکیورٹی کو فول پروف بنانے کے لیے گزشتہ ایک ماہ کے دوران پنجاب بھر میں ۴,۶۰۱ کومبنگ آپریشنز بھی کیے گئے۔ ان وسیع پیمانے کی کارروائیوں کے دوران ۱,۶۶,۵۵۳ افراد کی بائیومیٹرک و تحریری تصدیق کی گئی، جس کے نتیجے میں ۴۰۲ مشتبہ افراد کو حراست میں لے کر متعلقہ حکام کے حوالے کیا گیا۔