دہشتگردی کے بزدلانہ واقعات قوم کے عزم، حوصلے کو متزلزل نہیں کر سکتے: اویس لغاری

وفاقی وزیرِ توانائی سردار اویس احمد خان لغاری نے کوہاٹ میں ہونے والے دلخراش دھماکے کی شدید الفاظ میں مذمت کرتے ہوئے قیمتی انسانی جانوں کے ضیاع پر گہرے دکھ اور افسوس کا اظہار کیا ہے۔ وفاقی وزیر نے واقعے میں شہید ہونے والے افراد کے اہل خانہ سے دلی تعزیت کا اظہار کیا اور زخمیوں کی جلد از جلد مکمل صحت یابی کے لیے دعا کی، جبکہ انہوں نے دعا کی کہ اللہ تعالیٰ شہداء کے درجات بلند کرے اور ان کے لواحقین کو یہ صدمہ برداشت کرنے کے لیے صبرِ جمیل عطا فرمائے۔

سردار اویس احمد خان لغاری نے اپنے بیان میں واضح کیا کہ دہشت گردی کی ایسی بزدلانہ اور مذموم کارروائیاں پاکستانی قوم کے بلند عزم اور حوصلے کو ہرگز متزلزل نہیں کر سکتیں۔ انہوں نے کہا کہ فتنہ الخوارج کے خلاف جاری قومی جدوجہد میں پوری قوم اپنی باہمت سیکیورٹی فورسز کے شانہ بشانہ کھڑی ہے۔ وفاقی وزیر نے اس عزم کا اعادہ کیا کہ ملک سے دہشت گردی کے مکمل خاتمے تک سیکیورٹی اداروں کی کارروائیاں اور جدوجہد بلا توقف جاری رہے گی، دہشت گرد اپنے ناپاک عزائم میں کبھی کامیاب نہیں ہو سکتے اور پاکستان کے امن و استحکام کو نقصان پہنچانے کی ہر دشمنانہ کوشش کو ناکام بنا دیا جائے گا۔