میر رضا کیس: جوڈیشل کمیشن کا سینئر پولیس افسران سے تحریری جواب لینے کا فیصلہ

میر رضا کیس کی تحقیقات کے لیے قائم کردہ جوڈیشل کمیشن نے اہم پیش رفت کرتے ہوئے سینئر پولیس افسران کو شخصی طور پر طلب کرنے کے بجائے ان سے تحریری جواب حاصل کرنے کا فیصلہ کیا ہے۔ کمیشن کی جانب سے گزشتہ روز ہونے والی سماعت کا باضابطہ حکم نامہ جاری کر دیا گیا ہے، جس میں کارروائی کی تفصیلی پیش رفت اور آئندہ کے قانونی طریقہ کار کی وضاحت کی گئی ہے۔

حکم نامے کے مطابق کمیشن نے گزشتہ سماعت کے دوران سابق تفتیشی افسر شبیر لغاری کا بیان ریکارڈ کیا، جبکہ مقتول میر رضا کے بزنس پارٹنر احمد کا موقف بھی تفصیلاً سنا گیا۔ سماعت کے دوران احمد نے میر رضا کے اہل خانہ سے ملاقات اور گفتگو کے لیے وقت کی استدعا کی، جس پر کمیشن نے قرار دیا کہ اہل خانہ سے بات چیت کے بعد اگر احمد مزید کوئی موقف دینا چاہے تو وہ حلف نامے کے ذریعے پیش کر سکتا ہے۔ کمیشن نے واضح کیا کہ حلف نامے کے ذریعے جمع کرایا گیا یہ بیان عوامی معلومات کے لیے دستیاب ہو گا۔

حکم نامے میں مزید انکشاف کیا گیا ہے کہ تھانہ فیروز آباد اور تھانہ گلستانِ جوہر کے روزنامچے سیل شدہ حالت میں کمیشن کو موصول ہوئے، تاہم بدقسمتی سے روزنامچوں سے متعلق متعلقہ گواہان کے بیانات پہلے ہی ریکارڈ کیے جا چکے تھے۔ اس صورتحال کے مدنظر کمیشن نے دونوں روزنامچے اسی حالت میں حکومتِ سندھ کے فوکل پرسن کو واپس کر دیے ہیں۔ علاوہ ازیں، جوڈیشل کمیشن نے تحقیقاتی عمل میں مکمل تعاون فراہم کرنے پر نجی بینک کے سی ای او اور ڈویژنل سربراہ کی خدمات کو بھی سراہا ہے۔