وزیراعظم شہباز شریف تین روزہ دورے پر لندن پہنچ گئے

وزیراعظم پاکستان شہباز شریف اپنے تین روزہ سرکاری دورے پر لندن پہنچ گئے ہیں۔ لندن میں قیام کے دوران وزیراعظم اپنا باقاعدہ طبی معائنہ (چیک اپ) کروائیں گے، جس کے بعد وہ 20 ستمبر کو لندن سے امریکہ کے لیے روانہ ہوں گے۔

امریکہ دورے کے دوران وزیراعظم شہباز شریف اقوامِ متحدہ کی جنرل اسمبلی کے سالانہ اجلاس سے خطاب کریں گے، جہاں وہ عالمی امن، مشرقِ وسطیٰ کی موجودہ صورتحال اور عالمی مناقشات میں پاکستان کی ثالثی و امن قائم کرنے کی کوششوں پر پاکستان کے موقف کو تفصیل سے پیش کریں گے۔ اقوامِ متحدہ کے اجلاس کے مواقع پر وزیراعظم کی مختلف عالمی رہنماؤں سے سائیڈ لائن ملاقاتیں بھی متوقع ہیں۔ اس کے علاوہ، وہ امریکہ میں مقیم اوورسیز بزنس فورم کے نمائندوں کی جانب سے دیے جانے والے عشائیے میں شرکت کریں گے۔ امریکی دورہ مکمل کرنے کے بعد وزیراعظم شہباز شریف دوبارہ لندن پہنچیں گے، جہاں دو سے تین روز قیام کے بعد وہ وطن واپس روانہ ہوں گے۔