پاکستان کا بھارتی طیاروں کے لیے فضائی حدود کی پابندی میں23اکتوبر تک توسیع کا اعلان

حکومتِ پاکستان نے بھارتی طیاروں کے پاکستانی فضائی حدود استعمال کرنے پر عائد پابندی کی مدت میں مزید ایک سال کی توسیع کر دی ہے۔ سول ایوی ایشن اتھارٹی (CAA) کے ذرائع کے مطابق، تازہ ترین احکامات کے تحت بھارتی رجسٹرڈ کمرشل، چارٹرڈ اور عسکری (ملٹری) طیاروں کے پاکستانی حدود سے گزرنے پر اب 23 اکتوبر 2026ء تک مکمل پابندی عائد رہے گی۔

ایوی ایشن حکام نے واضح کیا ہے کہ اس پابندی کا اطلاق نہ صرف بھارت کی ملکیت میں موجود ایئرلائنز پر ہوگا، بلکہ بھارت میں رجسٹرڈ ایئرلائنز کی جانب سے غیر ملکی کمپنیوں سے لیز پر لیے گئے طیاروں پر بھی یکساں طور پر لاگو ہوگا۔ اس سلسلے میں تمام ایئر ٹریفک کنٹرولرز اور سول ایوی ایشن کے متعلقہ شعبوں کو نوٹم (NOTAM) کے ذریعے باضابطہ مراسلہ اور ہدایات جاری کر دی گئی ہیں۔

واضح رہے کہ پاکستان اور بھارت کے درمیان مئی 2025ء میں ہونے والی شدید عسکری جھڑپوں اور جنگ کے بعد پاکستان نے سیکیورٹی خدشات کے پیش نظر اپنی فضائی حدود بھارتی طیاروں کے لیے مکمل طور پر بند کر دی تھی۔ اس پابندی کے باعث بھارتی ایئرلائنز کو یورپی اور مغربی ممالک کی پروازوں کے لیے طویل اور متبادل روٹس استعمال کرنا پڑ رہے ہیں، جس سے ان کے ایندھن اور سفری اخراجات میں بھاری اضافہ ریکارڈ کیا گیا ہے۔