اسحاق ڈار سے امریکی ناظم الامور کی ملاقات، پاک امریکا تعلقات پر اہم گفتگو

نائب وزیراعظم اور وزیر خارجہ سینیٹر اسحاق ڈار سے پاکستان میں امریکی ناظم الامور نیٹلی بیکر (Natalie Baker) نے اسلام آباد میں اہم ملاقات کی، جس میں پاک امریکہ دوطرفہ تعلقات، تجارتی و معاشی تعاون اور مشرقِ وسطیٰ میں پیدا ہونے والی حالیہ علاقائی و بین الاقوامی صورتحال پر تفصیلی تبادلہ خیال کیا گیا۔ ترجمان دفتر خارجہ کے مطابق ملاقات کے دوران دونوں رہنماؤں نے خطے میں ہونے والی تازہ ترین عسکری و سفارتی پیش رفت اور امن و امان کے چیلنجز پر گفتگو کی۔

ملاقات کے دوران نائب وزیراعظم اسحاق ڈار نے علاقائی و عالمی سطح پر پائیدار امن کے قیام کے لیے جنگ کے بجائے مذاکرات اور سفارت کاری کی اہمیت پر زور دیا۔ انہوں نے پاکستان اور امریکہ کے متوازن دوطرفہ تعلقات میں ہونے والی مثبت پیش رفت اور دوطرفہ تعاون کی بحالی کو سراہتے ہوئے کہا کہ دونوں ممالک کے درمیان باہمی دلچسپی کے تمام امور پر باقاعدہ اور مسلسل رابطے جاری رکھنا انتہائی ضروری ہے۔

ترجمان دفتر خارجہ نے ملاقات کا احوال بتاتے ہوئے مزید واضح کیا کہ اقوام متحدہ کی جنرل اسمبلی (UNGA) کے آئندہ اجلاس میں پاکستان کے اعلیٰ سطح وفد کی قیادت وزیراعظم پاکستان شہباز شریف کریں گے، جو عالمی برادری کے سامنے پاکستان کا موقع اور علاقائی امن و سلامتی سے متعلق موقف پیش کریں گے۔