وزیراعظم کی خصوصی فیول ریلیف سکیم، ملک گیر آغاز کی تیاریاں مکمل

وزیراعظم شہباز شریف کی ہدایت پر مستحق شہریوں کے لیے خصوصی فیول ریلیف اسکیم کو ملک گیر سطح پر فعال کرنے کی تمام تیاریاں مکمل کر لی گئی ہیں۔ ترجمان دفتر خارجہ کے مطابق، نائب وزیراعظم اور وزیر خارجہ اسحاق ڈار کی زیرِ صدارت فیول سبسڈی پر قائم نیشنل اسٹیئرنگ کمیٹی کا نواں اہم اجلاس منعقد ہوا، جس میں اسلام آباد میں پائلٹ منصوبے کی کامیابی کے بعد اس اسکیم کا دائرہ کار پورے ملک میں پھیلانے کا باضابطہ فیصلہ کیا گیا۔ اسکیم کے تمام مالی اخراجات وفاقی حکومت خود برداشت کرے گی۔

اس فیول ریلیف اسکیم کا دائرہ کار موٹر سائیکلوں، رکشوں (تھری ویلرز) اور 800 سی سی تک کی تمام گاڑیوں پر محیط ہوگا، جبکہ کاروباری مقاصد کے لیے استعمال ہونے والے لوڈرز اور پک اپس کو بھی اس میں شامل کیا گیا ہے۔ حکام نے ملک بھر میں رجسٹریشن کے عمل کے آغاز کا اعلان کرتے ہوئے بتایا کہ مستحق شہری اپنا قومی شناختی کارڈ نمبر 9771 پر ایس ایم ایس کر کے اسکیم میں رجسٹرڈ ہو سکتے ہیں، جبکہ فیول ٹوکنز کے ذریعے سستا پٹرول حاصل کرنے کے مرحلے کا باقاعدہ آغاز بدھ اور جمعرات کی درمیانی شب سے ہو جائے گا۔

اجلاس کے دوران اسحاق ڈار نے اسٹیٹ بینک آف پاکستان کے ذریعے پٹرول پمپس کو تمام ادائیگیاں 24 گھنٹے کے اندر مکمل کرنے کے واضح احکامات جاری کیے۔ انہوں نے صوبائی حکومتوں کو ہدایت کی کہ ضلعی سطح پر عوامی آگاہی مہمات چلائی جائیں تاکہ ہر شہری کو اس سہولت کا علم ہو سکے۔ نائب وزیراعظم نے تاکید کی کہ فیول ریلیف اسکیم کی شفافیت کو یقینی بنایا جائے تاکہ حکومت کی اس سبسڈی کا حقیقی فائدہ کسی بلا رکاوٹ کے صرف اور صرف مستحق افراد تک ہی پہنچے۔