اسحاق ڈار اور رافیل گروسی میں رابطہ، اسلام آباد مفاہمتی یادداشت پر عملدرآمد پر اتفاق

نائب وزیراعظم اور وزیر خارجہ سینیٹر محمد اسحاق ڈار نے بین الاقوامی ایٹمی توانائی ایجنسی (آئی اے ای اے) کے ڈائریکٹر جنرل اور اقوام متحدہ کے سیکریٹری جنرل کے امیدوار رافیل گروسی سے ٹیلی فون پر رابطہ کیا ہے، جس کے دوران دونوں رہنماؤں نے خطے کی بدلتی ہوئی سیکیورٹی صورتحال کا تفصیلی جائزہ لیا۔ ترجمان دفتر خارجہ کے مطابق گفتگو میں علاقائی کشیدگی میں کمی اور استحکام کے لیے مختلف پہلوؤں پر غور کیا گیا۔

ملاقات کے دوران اسحاق ڈار اور رافیل گروسی نے متفقہ طور پر اس بات کا اظہار کیا کہ خطے میں تناؤ کو کم کرنے اور حالات کو معمول پر لانے کے لیے ‘اسلام آباد مفاہمتی یادداشت’ (Islamabad Memorandum of Understanding) پر کامل عملدرآمد ہی سب سے بہترین اور موثر راستہ ہے۔ اس موقع پر آئی اے ای اے کے سربراہ نے ضرورت پڑنے پر تکنیکی معاونت فراہم کرنے کی پیشکش بھی کی۔

نائب وزیراعظم اسحاق ڈار نے اقوام متحدہ کے منشور، عالمی قوانین اور بین الاقوامی معاہدوں کی پاسداری کے حوالے سے پاکستان کے مسلسل عزم کا اعادہ کیا۔ انہوں نے عالمی امن و ترقی کے مقاصد کو آگے بڑھانے میں اقوام متحدہ کے نظام کی اہمیت پر زور دیا، نیز اقوام متحدہ کے اگلے سیکریٹری جنرل کے عہدے کی دوڑ میں شامل رافیل گروسی کے لیے پاکستان کی جانب سے نیک خواہشات کا اظہار بھی کیا۔