پاکستان سمیت دنیا بھر میں آج ’’ورلڈ ہیلتھ ڈے‘‘ منایا جارہا ہے

پاکستان سمیت دنیا بھر میں آج 7 اپریل کو صحت کا عالمی دن (World Health Day) منایا جا رہا ہے، جس کا مقصد عوام میں جسمانی و ذہنی تندرستی کی اہمیت اجاگر کرنا اور ایک صحت مند معاشرے کی تشکیل کو فروغ دینا ہے۔ اس دن کی شروعات 1950 میں عالمی ادارہ صحت (WHO) کے زیرِ اہتمام ہوئی تھی، جس کے بعد سے ہر سال اس موقع پر مختلف طبی تنظیموں اور این جی اوز کے تعاون سے خصوصی تقریبات کا انعقاد کیا جاتا ہے۔ ماہرینِ صحت کا کہنا ہے کہ صحت محض بیماری سے پاک ہونے کا نام نہیں بلکہ یہ مکمل جسمانی، ذہنی اور سماجی تندرستی کا مجموعہ ہے۔

پاکستان میں اس دن کی اہمیت اس لیے بھی بڑھ جاتی ہے کیونکہ یہاں ہر سال ہزاروں بچے صاف پانی کی عدم دستیابی اور غذائی قلت کے باعث لقمہ اجل بن جاتے ہیں۔ وزارتِ صحت اور پاکستان میڈیکل ایسوسی ایشن کے مطابق، دورِ حاضر میں وسائل کی کمی، تحقیق کے فقدان اور گورننس کے مسائل نے نظامِ صحت کو شدید پیچیدگیوں سے دوچار کر دیا ہے۔ آج کے دن شہریوں کو صحت مند طرزِ زندگی کے اصولوں سے آگاہ کیا جا رہا ہے تاکہ وہ بیماریوں کے خلاف بہتر دفاع کر سکیں۔ عالمی ادارہ صحت نے بھی اس عزم کا اعادہ کیا ہے کہ عالمی سطح پر صحت کے نظام میں اصلاحات اور غریب ممالک میں طبی سہولیات کی بہتری ان کی اولین ترجیح رہے گی۔