جوان لڑکی ’’بڑھاپے سے بچاؤ‘‘ کا انجکشن لگواتے ہی مر گئی!

بڑھاپے سے بچنے اور ہمیشہ جوان نظر آنے کی خواہش میں 27 سالہ امریکی لڑکی ایک اتائی کے جھانسے میں آ کر اپنی جان سے ہاتھ دھو بیٹھی۔ نیویارک شہر کے ایک طبی مرکز میں جوان رہنے کے لیے اینٹی ایجنگ (بڑھاپا روکو) انجکشن لگوانے کے کچھ ہی دیر بعد لڑکی کی حالت شدید بگڑ گئی۔ اسے فوری علاج کے لیے ایمبولینس میں اسپتال منتقل کیا جا رہا تھا، تاہم وہ راستے میں ہی دم توڑ گئی۔

واقعے کے بعد پولیس اور مقامی حکام نے فوری کارروائی کرتے ہوئے انجکشن لگانے والے 55 سالہ شخص ڈاکٹر لوئس روخاس کیبریرا کو گرفتار کر لیا۔ دورانِ تفتیش ملزم نے اعتراف کیا کہ اس کے پاس نیویارک ریاست میں طب کی پریکٹس کا کوئی باقاعدہ لائسنس نہیں ہے۔ حکام نے اس کے خلاف لاپروائی سے شہریوں کی زندگی خطرے میں ڈالنے اور بغیر لائسنس کے پریکٹس کرنے کے الزامات کے تحت مقدمہ درج کر لیا ہے۔

ملزم کیبریرا کو برونکس کی عدالت میں پیش کیا گیا، جہاں اس نے بتایا کہ وہ ڈومینیکن ریپبلک میں لائسنس یافتہ ڈاکٹر ہے، جبکہ نیویارک میں اس کے پاس صرف ایک بیوٹیشن (کاسمیٹولوجسٹ) کا لائسنس ہے۔ عدالت نے پوسٹ مارٹم کے حتمی نتائج آنے تک پاسپورٹ ضبط کرنے کی شرط پر ملزم کی عارضی ضمانت منظور کر لی ہے۔