سردیوں میں مدافعت بڑھانے والی 5 بہترین غذائیں جو بیماریوں سے بچائیں

سردیوں میں انسانی جسم کی مدافعت تقریباً 35 فیصد کم ہو جاتی ہے، جس سے نزلہ، کھانسی اور فلو کے خطرات بڑھ جاتے ہیں۔ نئی تحقیق میں بتایا گیا ہے کہ چند قدرتی غذائیں اور گرم مشروبات اس کمی کو مؤثر طور پر دور کر سکتے ہیں۔

وہ لوگ جو سردیوں میں گُڑ، تل، دلیہ، خشک میوے اور وٹامن C والے پھل استعمال کرتے ہیں، ان میں بیماریوں کے کیسز 40 فیصد تک کم دیکھے گئے ہیں۔

گُڑ اور تل کا حلوہ جسم کو فوری حرارت دیتا ہے، خون میں آئرن بڑھاتا ہے اور سانس کی نالی کو مضبوط رکھتا ہے۔ خشک میوہ جات جیسے بادام، اخروٹ اور کاجو دماغی کارکردگی بہتر کرتے ہیں اور سوجن کو کم کرتے ہیں۔

اسی طرح ادرک اور شہد والی چائے مدافعت بڑھانے کے ساتھ گلے اور سانس کی تکلیف میں بھی آرام دیتی ہے۔ دلیہ / اوٹس دیرپا توانائی فراہم کرتے ہیں، نظام ہاضمہ مضبوط کرتے ہیں اور دل کی صحت کے لیے مفید ہیں۔ گاجر، مالٹا اور مچھلی وٹامن A اور C سے بینائی اور جلد بہتر کرتے ہیں اور اومیگا 3 سے دل اور دماغ محفوظ رہتے ہیں۔

سردیوں میں وٹامن D کی کمی بھی عام ہے، جو ہڈیوں اور مدافعت پر اثر ڈال سکتی ہے۔ ماہرین نے مشورہ دیا ہے کہ روزانہ سورج کی روشنی لیں اور وٹامن D والے سپلیمنٹس یا غذا جیسے انڈے، دودھ اور مچھلی استعمال کریں۔

مزید یہ کہ سردیوں میں پانی کی کمی بھی ایک عام مسئلہ ہے۔ لوگ کم پانی پیتے ہیں، جس سے جلد خشک، گردے کمزور اور توانائی کم ہو سکتی ہے۔ دن بھر کم از کم 6–8 گلاس پانی پینا ضروری ہے اور جوس یا چائے پانی کا متبادل نہیں ہے۔ گرم پانی یا ہربل چائے پینے سے جسم گرم رہتا ہے اور جلد صحتمند رہتی ہے۔

ماہرین نے والدین اور بچوں کے لیے بھی ہدایت دی ہے کہ حلوہ اور خشک میوہ جات محدود مقدار میں استعمال کریں، شہد نیم گرم پانی میں ملائیں اور بچوں کو بہت زیادہ ٹھنڈے مشروبات نہ دیں۔