ماہرین صحت کی نشاندہی: چند سبزیاں کینسر کے خطرے کو کم کرنے میں مددگار

ماہرین صحت نے انکشاف کیا ہے کہ باورچی خانے میں موجود کچھ عام سبزیاں کینسر کے خطرے کو کم کرنے میں مددگار ثابت ہو سکتی ہیں۔ ان سبزیوں میں شامل قدرتی اجزاء جسم کو اندرونی طور پر مضبوط بناتے ہیں اور نقصان دہ خلیات کے خلاف دفاعی کردار ادا کرتے ہیں۔

طبی تحقیق کے مطابق پھول گوبھی، بند گوبھی، پالک، ٹماٹر، لہسن، پیاز، گاجر، شملہ مرچ اور چقندر جیسی سبزیاں اینٹی آکسیڈنٹس اور فائبر سے بھرپور ہوتی ہیں۔ یہ سبزیاں نہ صرف مدافعتی نظام کو بہتر بناتی ہیں بلکہ آنتوں، معدے، پھیپھڑوں اور پروسٹیٹ کینسر کے خطرے کو بھی کم کر سکتی ہیں۔

ماہرین کا کہنا ہے کہ اگر ان سبزیوں کو روزانہ کی خوراک کا حصہ بنایا جائے تو صحت پر مثبت اثرات مرتب ہو سکتے ہیں۔ تاہم، صرف غذا ہی نہیں بلکہ ورزش، تمباکو نوشی سے پرہیز اور باقاعدہ چیک اپ بھی کینسر سے بچاؤ کے لیے ضروری ہیں۔