نمک کا زیادہ استعمال ہارٹ فیلیئر کے خطرات میں اضافہ کرتا ہے: تحقیق

وینڈر بلٹ یونیورسٹی کی ایک حالیہ طبی تحقیق میں انکشاف کیا گیا ہے کہ نمک (سوڈیم) کا زیادہ استعمال براہِ راست اور دیگر طبی عوامل سے قطع نظر ‘ہارٹ فیلئر’ (دل کی ناکامی) کا باعث بن سکتا ہے۔ 25 ہزار سے زائد افراد پر کی گئی اس تحقیق کے مطابق، روزانہ تجویز کردہ 2300 ملی گرام کی حد کے بجائے شرکاء اوسطاً 4269 ملی گرام نمک استعمال کر رہے تھے، جو کہ مقررہ مقدار سے تقریباً دو گنا زیادہ ہے۔ ماہرین نے خبردار کیا ہے کہ غذا میں نمک کی ہر اضافی 1000 ملی گرام مقدار پہلی بار ہارٹ فیلئر کے خطرے میں 8 فیصد اضافہ کر دیتی ہے، جبکہ مجموعی طور پر زیادہ نمک کھانے والوں میں دل کی بیماریوں کا خطرہ 15 فیصد تک بڑھ جاتا ہے۔ محققین کا کہنا ہے کہ نمک کے استعمال میں معمولی کمی بھی خاص طور پر ہائی رسک گروپس میں دل کے امراض کے عالمی بوجھ کو نمایاں طور پر کم کرنے میں کلیدی کردار ادا کر سکتی ہے۔