امریکا میں خطرناک ’ویسٹ نائل وائرس‘ کا پھیلاؤ

واشنگٹن: امریکہ میں مچھروں کے کاٹنے سے پھیلنے والے مہلک اور خطرناک ‘ویسٹ نائل وائرس’ (West Nile Virus) کے کیسز میں تشویشناک حد تک اضافہ ریکارڈ کیا گیا ہے، جہاں رواں سال اب تک 30 امریکی ریاستوں میں 180 سے زائد افراد وائرس سے متاثر ہو چکے ہیں جبکہ کم از کم 8 افراد کی ہلاکت کی تصدیق کی گئی ہے۔

امریکی سینٹرز فار ڈیزیز کنٹرول اینڈ پریوینشن (CDC) کے جاری کردہ تازہ اعداد و شمار کے مطابق، ایریزونا اس وائرس سے سب سے زیادہ متاثر ہونے والی ریاست بن چکی ہے، جہاں اب تک 73 کیسز رپورٹ ہوئے ہیں اور 5 مریض جان کی بازی ہار چکے ہیں۔ اسی طرح ریاست کیلیفورنیا میں بھی صورتحال تشویشناک شکل اختیار کر گئی ہے، جہاں اب تک 30 افراد میں وائرس کی تصدیق ہو چکی ہے جن میں سے 3 مریض انتقال کر گئے ہیں۔ حکام کے مطابق کیلیفورنیا میں سامنے آنے والے یہ کیسز گزشتہ سال کے اسی عرصے کے مقابلے میں تقریباً تین گنا زیادہ ہیں۔

طبی ماہرین کا کہنا ہے کہ ویسٹ نائل وائرس بنیادی طور پر متاثرہ مچھروں کے کاٹنے سے انسانوں میں منتقل ہوتا ہے اور شدید حالات میں یہ وائرس انسان کے دماغ، اعصابی نظام اور سائنسی فعالیت کو سخت نقصان پہنچا سکتا ہے۔ کیلیفورنیا کے علاقے ایلک گروو سے تعلق رکھنے والا ایک 70 سالہ شخص بھی اس وائرس کا شکار ہو کر ہسپتال منتقل کیا گیا، جہاں اس کی حالت نازک بتائی جا رہی ہے۔

متاثرہ شخص کے اہل خانہ اور صحت کے عالمی اداروں نے شہریوں پر زور دیا ہے کہ وہ مچھروں سے بچاؤ کے لیے فوری اور سخت احتیاطی تدابیر اختیار کریں۔ ماہرین کے مطابق مچھر بھگانے والے سپرے (Repellents) کا استعمال، جسم کو مکمل ڈھانپنے والے کپڑے پہننا، اور گھروں کے ارد گرد کھڑے پانی کا خاتمہ کر کے مچھروں کی افزائش کو روکنا ہی اس بیماری سے بچاؤ کا واحد اور مؤثر طریقہ ہے۔