ذیابیطس کے نئے علاج کی آزمائش، متعدد مریض شفایاب

شکاگو: طبی تحقیق کی تاریخ میں ایک بڑا سنگِ میل عبور کر لیا گیا ہے، جہاں یونیورسٹی آف شکاگو میڈیسن ٹرانسپلانٹ انسٹیٹیوٹ کے محققین نے اعلان کیا ہے کہ ٹائپ 1 ذیابیطس میں مبتلا متعدد مریض کامیاب آزمائش کے بعد مکمل طور پر شفایاب ہو گئے ہیں۔ ٹائپ 1 ذیابیطس، جو کہ ایک آٹو امیون بیماری ہے اور جس میں جسم کا مدافعتی نظام لبلبے کے انسولین بنانے والے خلیوں کو تباہ کر دیتا ہے، اب اس کا علاج ‘آئیلٹ خلیات’ (Islet Cells) کی پیوند کاری میں تلاش کر لیا گیا ہے۔

اس تجرباتی آزمائش میں 10 ایسے مریضوں کو شامل کیا گیا جو شدید نوعیت کی ٹائپ 1 ذیابیطس کا شکار تھے۔ محققین نے ان کے جسم میں آئیلٹ خلیات (جو بلڈ شوگر کنٹرول کرنے والے ہارمونز بناتے ہیں) کی پیوند کاری کی۔ حیرت انگیز طور پر، محض چار ہفتوں کے اندر تمام 10 مریضوں کے جسم نے خود سے انسولین بنانا شروع کر دی، جس کے بعد انہیں مہنگے انسولین انجیکشنز اور خون میں شوگر لیول کی مسلسل نگرانی سے مستقل نجات مل گئی۔

طبی ماہرین کے مطابق، یہ طریقہ علاج ‘ڈائبیٹک کیٹو ایسیڈوسِس’ جیسی جان لیوا حالتوں، گردوں کی خرابی اور دل کے دورے کے خطرات کو ختم کرنے میں کلیدی ثابت ہو سکتا ہے۔ اگرچہ یہ ابھی ابتدائی مرحلہ ہے، لیکن محققین پرامید ہیں کہ مستقبل قریب میں یہ طریقہ علاج دنیا بھر کے ذیابیطس کے مریضوں کے لیے عام دستیاب ہوگا۔